जनसुरक्षाया नितिं जनस्वयम् सेवक परिचालन
येँ (सन्ध्या टाइम्स)/एकीकृत माआवादीं दयेकूगु जनस्वयम सेवक ब्यूरो विधिवत रुपं थनिंनिसें परिचालन याःगु दु। माओवादीं उत्पादन, निर्माण व जनसुरक्षाया निंतिं धकाः उगु स्वयमसेवक परिचालन याःगु खः ।
माओवादीया जन स्वयमसेवक अभियान धकाः थौं येँया बसन्तपुली मुंकाः मार्च पास यासें परिचालन याःगु खः। स्वनिगःया स्वंगू हे जिल्लाया जन स्वयम सेवकत मुंकाः उगु मार्च पास याःगु खः। द्वलंद्वः स्वय्मसेवीतय्सं ब्वति काःगु उगु मार्च पास शान्तिबाटिकाय् वनाः क्वचायेकूगु खः। अथे हे स्वनिगलं पिने ७२ जिल्लाय् नं थनिंनिसें हे जनस्वयम सेवक अभियान न्ह्याकेगु ज्याझ्वः तयातयागु दु खँ उगु ब्यूरोया केन्द्रीय दुजः नापं माओवादी नेवाः राज्य समितिया सहसचिव डिके प्रजापति भिष्मं कनादीगु दु। वय्कलं उगु ब्यूरो नगरपालिकाया हकय् वडा स्तर तक अले गाउँ विकास समितिया हकय् गाविसय् तक संगठन निर्माण यानाः लाखौं नेपाःमितय्त परिचालन यायेगु जुइ धयादीगु दु। विशेष यानाः आःया अवस्थाय् नेपाःमि जनता निराश जुयाच्वंगु इलय् जनताया नितिं ज्या यायेत, जनतायात सुरक्षा बीत, विकास निर्माणया ज्या यायेत नाप नापं उत्पादनया ज्या यायेगु निंतिं थ्व जनस्वयसेवक ब्यूरो दयेकागु खँ नं वय्कलं कनादिल ।
नेता भिष्मं जनस्वयम सेवकया लुखा सकस्यां निंतिं खुल्ला दु धासें राजनीतिक रुपं न्ह्यागु हे विचाः दुपिं मनू जूसां थुकी दुथ्याका यंकेगु जुइ धकाः नं स्पष्ट यानादिल ।
