हाप्वलं पिहां वल मथुराया 'कस्ति'
नेपालभाषा साहित्यया नांजाःम्ह उपन्यासकार व बाखंच्वमि मथुरा साय्मिया न्हूगु बाखं मुना 'कस्ति' शुक्रवाः विमोचन जुल। हाप्वःया किपा तयातःगु बाकसपाखें नेपालभाषा परिषद्या नायः फणीन्द्ररत्न वज्राचार्यं सफू पिकासें विमोचन यानादीगु खः।
ज्याझ्वलय् न्ववासें मूपाहां वज्राचार्यं उपन्यासकार साय्मिं थ्व स्वयां न्ह्यः च्वयादीगु उपन्यास 'माकुगु विष' ला गुलि साः धाःसा आः झन 'कस्ति' हे बियादीगु झन हे साइ जुइ धयादिल ।
नेपालभाषा केन्द्रीय विभागया अध्यक्ष प्रा. प्रेमशान्ति तुलाधरं न्हूगु सफू 'कस्ति' इ दुथ्यानाच्वंगु बाखंयात कयाः समीक्षा यानादिल। वय्कलं मथुरा साय्मिया बाखं मुक्कं रोचक व कौतुहलतां जाः धासें फुक्कं बाखं ब्वनावंलिसे न्ह्यइपुया वइ धयादिल ।
सफू च्वमि मथुरा साय्मिं थौंकन्हय् नेपालभाषाया सफू प्रकाशन व ब्वँमिया तःधंगु समस्या जुयाच्वंगु खँ समेत कुलादिसें च्वइपिं उत्साहित याइगु वातावरण मदुगु बिचाः प्वंकादिल। लिसें वय्कलं सफुली दुथ्याःगु छगू बाखं नं पाठ यानादिल ।
सभापतिया थासं न्ववासें बाखं च्वमि भूषणप्रसाद श्रेष्ठं च्वमि मथुरा साय्मिया बाखं च्वयेगु व ब्वनेगु आकर्षण शैली बारे चर्चा यानादिल ।
सफूया प्रकाशन संस्था अर्थ पिथना प्रकाशन प्रा.लि.पाखें सुरेश मानन्धरं लसकुस यासें थौं भाषा ख्यलय् ब्वँमिया समस्या दुसां मथुरा साय्मि थेंज्याःपिं च्वमितय्सं च्वयेगु दिके मजिउ धयादिल ।
