अर्थ सचिव खनाल व कंसाकारया स्वापू
येँ (सन्ध्या टाइम्स)/ अर्थ सचिव रामेश्वर खनालं अर्थमन्त्री भरत मोहन अधिकारीया दवावया कारणं राजीनामा बियादीगु धकाः खँ वयाच्वंसां वय्कलं राजीनामा बियादीगुया मेगु छगू रहस्य पिहां वःगु दु ।
अर्थ सचिव खनालं राजीनामा बियादीगुया मेगु कारण नेपाल वायुसेवा निगम व अनया निलम्बित कार्यकारी अध्यक्ष सुगतरत्न कंसाकार नाप नं स्वापू दुगु खँ सूत्रं धाःगु दु। विशेष यानाः नेपाल वायुसेवा निगमया निलम्बित कार्यकारी अध्यक्ष सुगतरत्न कंसाकारनाप नं वय्कःया राजीनामाया स्वापू दुगु खँ धाःगु दु ।
कंसाकारयात फँसे यायेगु ज्याय् खनालया नं तःधंगु भूमिका दुगु दावी सूत्रं याःगु दु। कंसाकार छम्ह कुशल व्यवस्थापक खः धकाः प्रमाणित जुइ धकाः ग्यानाः प्रक्रिया फुक्क पूवंकूगु जूसां नं अर्थ मन्त्रालयपाखें विमान न्यायेगु लागिं सरकार जमानी च्वने फइ मखु धकाः पना तःम्ह छम्ह मुख्य मनू सचिव खनाल नं खः ।
उलि जक मखु, निगमं आः बैना लित कयाहःगु वहे जहाज न्यायेमाल धाःसा न्हापा स्वयां निगू अर्ब तका अप्वः तयेमाली। उकिं आः निगमं अप्वः ध्यबा पुलाः विमान न्यायेमाल धाःसा उकियात कयाः नं अख्तियारय् मुद्दा लाये फु। छुं जुयाः थुकी मुद्दा लात धाःसा उकी सचिव खनाल नं दोषी ठहर जुइ फइगु सम्भावना दु। अय् जुयाः नं वय्कलं हथासं राजीनामा बियादीगु खः धकाः वय्कःयात सतिकं म्हसिउपिं मनूतय्सं धाःगु दु ।
