एसएलसी: नेपालभाषाया बिजोग
येँ (सन्ध्या टाइम्स)/एसएसलसी थेंज्याःगु महत्वपूर्ण जाँचय् नं न्ह्यसःपौ दयेकीपिं शिक्षक व परीक्षा नियन्त्रण कार्यालयया लापर्वाहीं यानाः म्हिगः जूगु नेपालभाषा विषयया परीक्षाया बिजोग जुल ।
नेपालभाषा विषयय् पुलांगु कोर्शया सफूपाखें तयार यानातःगु न्ह्यसःपौ इना बिउगु खः। थुकिं यानाः विद्यार्थीतय्सं जाँच हे बी मफयाः फुक्क धइथें स्कूलय् जाँच 'ड्रप' यायेमाःगु अवस्था वल। न्हूगु कोर्श शुरु जूगु हे च्यादँ गुदँ दयेधुंकल तर म्हिगः धाःसा व स्वयां नं पुलांगु सफूपाखें दयेका तःगु न्ह्यसःपौ वःगु खः। नेपालभाषा विषयया विद्यार्थीत अलमल जुइवं परीक्षा नियन्त्रण कार्यालयय् स्वापू तःबलय् अनं गल्ती जूगु स्वीकार यासें थुकिया परीक्षा लिपा कायेगु खँ धाःगु खः। तर मिति धाःसा मबिउनि। गुलिं स्कूलय् धाःसा अनया अन हे न्ह्यसः दयेकाः म्हिगः हे जाँच काःगु नं खँ दु ।
एसएलसी थेंज्याःगु अतिकं मर्यादित व सतर्कतापूर्वक काइगु परीक्षाय् थथे लापर्वाहीपूर्वक न्ह्यसः दयेकूगुलिं थुकिया बारे छानबीन यायेमाःगु माग सम्बन्धित शिक्षक व विद्यार्थीतय्सं याःगु दु ।
