थौं नं कांग्रेसं संसद न्ह्याकेमब्यू / संसदया मुँज्या स्थगित
अर्थसचिव रामेश्वर खनालया राजीनामा प्रकरणया बारे प्रधानमन्त्री झलनाथ खनालं लिसः बिइमाःगु माग यासें नेपाली कांग्रेसं थौं नं संसदया मुँज्या अवरुद्ध याःगु दु ।
कांग्रेस नेतातय्सं प्रधानमन्त्रीया लिसः मवतले संसदया मुँज्या न्ह्याकेमबिइगु धासें मुँज्या अवरुद्ध यायेवं सभामुख सुभाषचन्द्र नेम्वाङं संसदया मुँज्या आइतवाः ३ बजे तकया निंतिं स्थगित यानादीगु दु ।
प्रधानमन्त्रीया पलेसा अर्थमन्त्री भरतमोहन अधिकारीं लिसः बिइत स्वःसां कांग्रेसया सभासद्तय्सं अधिकारीयात न्वावयेमब्यूसें नाराबाजी याःगु खः । अर्थ मन्त्री अधिकारीं सभामुखनाप ई मकासें न्ववायेत स्वयेवं अर्थमन्त्री व कांग्रेस सभासद्त दथुइ छुं ई भनाभनया अवस्था ब्वलंगु खः ।
वस्वयां न्ह्यः कांग्रेस नेता डा. रामशरण महतं संसद् न्ववानादिसें दबावया हुनिं अर्थ सचिव खनालं राजीनमा ब्यूगु दाबी यानादिल । अथेहे कांग्रेस सचेतक लक्ष्मण घिमिरें प्रधानमन्त्रीया लिसः मवयेकं संसदया मुँज्या न्ह्याकेगुया छुं अर्थ मदुगु धयादिल ।
निम्ह नेतातय्सं न्ववायेधुंकाः कांग्रेस सभासदत थःगु थासय् मच्वंसे दनाच्वंगु खः । सभामुख नेम्वाङं थःथःगु थासय् च्वनेत तःक्व इनाप याःसां कांग्रेस सभासदत दनाच्वनेवं नियमित कार्यसूची मवंसें मुँज्या स्थगित याःगु खः ।
कांग्रेसं अर्थसचिवाया राजीनामा नापं शान्ति सुरक्षा, चितवन अस्पतालया कार्यकारी निर्देशक नियुक्ति लगायत विषयलय् प्रधानमन्त्रीं संसदय् लिसः बिइमाःगु माग यानाच्वंगु दु ।
