न्ववायेमब्यू धासें सभासद् पासवानं मेच वांछ्वल
दलित जनजाति पार्टीया सभासद् विसेन्द्र पासवानं संवैधानिक समितिया मुँज्याय् थःत न्ववायेत पर्याप्त मब्यूगु धासें मेच वांछ्वयाः तँ प्वंकूगु दु ।
संवैधानिक समितिया थौं च्वंगु मुँज्याय् सभासद् पासवानं आदिवासी जानताति, दलित व मुस्लिमतय् अधिकारया विषयलय् तःधंगु दलत गम्भीर मजूगु धासें मेच वांछ्वःगु खः । प्यंगू तल्ला च्वये जुयाच्वंगु समितिया मुँज्याया दथुइ सभासद् पासवानं २४ नम्बरया मेच वांछ्वःगु खः । उगु मेच पूर्णरुपं क्षति जूगु दु ।
राज्य पुर्नसंरचाना व राज्य शक्तिया बाँडफाँड समितिया प्रतिवेदन बारे सहलह जुयाच्वंगु मुँज्याय् तःधंगु दलतय्त निर्धारित ई स्वयां अप्व न्ववाये ब्यूगु तर चिधंगु दलतय्त धाःसा ई मब्यूगु धासें सभासद् पासवानं तँ प्वंकूगु खः ।
थ्वस्वयां न्ह्यः म्हिग च्वंगु मुँज्याय् सभासद् पासवान, संघीय लोकतान्त्रिक राष्ट्रिय मञ्चया रुक्मणी चौधरी व स्वतन्त्र सभासद् सदरुल मिया हकं मुँज्याय् अवरोध याःगु खः । थौंया मुँज्याय् नं तनाव जुइवं समितिया सभापति निलाम्बर आचार्यं वइगु मंगलवाः तकया निंतिं मुँज्या स्थगित यानादीगु दु ।
