थनिंनिसें नेपालय् लोडसेडिङ पूर्ण रुपं बन्द
थनिनिसें नेपालय् लोडसेडिङ पूर्ण रुपं बन्द जुइगु जूगु दु । नेपाःयात माःगु गाक्क विधुत नेपालय् हे उत्पादन जुयाच्वंगु खःसां भ्रष्टाचारी व कमीशनखोरतय्सं नेपालय् विधुत मगाः धकाः सुचुकेगु व मसिइकं हजारौं मेगावाट विधुत भारतय् मिइगु याना वयाच्वंगु खुलाशा जूगु दु ।
नेपाल विधुत प्राधिकरणया वंगु दँया तथ्यांक कथं नेपाःया दक्कले तःधंगु काली गण्डकी 'क' विधुत परियोजनां १ सय ४४ मेगावाट विधुत उत्पादन जुइगु धयातःगु दु । वास्तवय् उगु परियोजनां ४ सय मेगावाट विधुत उत्पादन जुइगु यानाच्वंगु खँ श्रोतं न्ह्यथंगु दु । अथे हे मध्य मर्स्याङ्दि जलविधुत परियोजनां ७० मेगावाट विधुत उत्पादन जुइगु धकाः प्राधिकरणं धाःसां उगु परियोजना मार्फत म्होतिं ३ सय मेगावाट विधुत उत्पादन जुइगु खँ श्रोतं दावी याःगु दु । नेपालय् कम जक विधुत उत्पादन जुयाच्वंगु धकाः क्यनाः नेपाःमितय्त लोडसेडिङया मारय् लाकाः ल्यं दुगु विधुत भारतय् निर्यात जुयाच्वंगु खँया भण्डाफोर जुइवं आपूर्ति मन्त्रालयया गुलिखे उच्च पदाधिकारीत भूमिगत तकं जुइधुंकूगु समाचार प्राप्त जूगु दु ।
वंगु वालय् भ्याटया विषयस करोडौंया घोटला जूगु व रामेश्वर प्रसाद खनाल समाचार लिपा नेपाःया विधुतिय स्थिति बारे थुगु तथ्य सार्वजनिक जुइ धुंकाः आपूर्ति मन्त्रीया राजीनामाया माग यासें नेपाःया थीथी थासं स्वतःस्फुर्त रुपं नागरिक जुलुस पिदनाच्वंगु दु ।
ब्वमिपिं, थुगु समाचार छितः गथे ताल ? थौं अप्रिल फुल दिंया लसताय् जिपिं नेपालमण्डल डट कमपाखें छझाः न्ह्याइपुकागु खः । थ्व समाचार सही मखु, तर थज्याःगु व्यहोराया समाचार मखु थज्याःगु शीर्षकया समाचार याकनं हे पिदंगु स्वयेदयेकेत झीपि दक्वं लोडसेडिङ विरोधय् जायेनु ।
