सचिव खनालयात लिहांवयेत अर्थमन्त्रीया इनाप

अर्थमन्त्री भरतमोहन अधिकारीं थःगु मन्त्रालया सचिव रामेश्वर खनालयात मन्त्रालय लिहांवयेत इनाप यानादीगु दु । छुं दिं न्ह्यः खनालं आकाझाकां राजीनामा बिइवं मन्त्री अधिकारीं थज्याःगु इनाप यानादीगु खः ।

अर्थ मन्त्रालयलय् थौं छगू पत्रकार सम्मेलन यानाः मन्त्री अधिकारीं सचिव खनालयात राजीनामा बिइत थःम्हं छुं नं कथंया दबाव मबीयाःगु स्पष्ट यानादीगु दु । थीथी संचार माध्यमय् थःगु कारणं खनालं राजीनामा ब्यूगु बुखँ प्रति लक्षित यासें वय्कलं नक्कली भ्याट बिल, क्यासिनो लगायत विषयलय् छुं नं कथंया दबाव मबीयाःगु धयादिल ।

खनालं सुयातं मधासें राजीनामा ब्यूगु धयादिसें मन्त्री अधिकारीं वय्कःया राजीनामा थःगु निंतिं नं दुर्भाग्यपूर्ण जूगु धयादिल ।