प्रचण्डयात संयोजकं लित सःतेगु निर्णय
येँ (सन्ध्या टाइम्स)/संविधान दयेकेगु ज्याय् वयाच्वंगु विवाद समाधान यायेगु लागिं संवैधानिक समिति अन्तर्गत गठन यानातःगु उपसमितिया संयोजक हीकेगु धकाः माओवादीं हःगु प्रस्तावं यानाः आः उपसमिति हे भंग जू वनीगु खः लाकि धइगु ग्याःचिकु ब्वलंगु दु ।
आः नकतिनि १५ न्हुया म्याद थपे याःगु उगु उपसमितिया संयोजकय् थौंकन्हय् माओवादी अध्यक्ष प्रचण्ड च्वनाच्वंगु दु। माओवादीया म्हीग च्वंगु स्थायी समितिया बैठकं उगु उपसमितिइ मेमेगु पार्टीतय्सं केन्द्रीय सदस्य तक हे मखुपिं मनूतय्त छ्वया हयातःगु दुसा थःपिंसं जक पार्टी अध्यक्ष थ्यंक छ्वये माःगु आवश्यकता मदु धासें उपाध्यक्ष नारायणकाजी श्रेष्ठयात छ्वयेगु प्रस्ताव न्ह्यःने हःगु खः। तर उपसमितिय मेगु पार्टीतय्सं धाःसा संयोजक हीकेगु प्रस्तावयात अस्वीकार याःगु दु ।
अध्यक्ष प्रचण्डं थः तसकं लिमलाःगु व उकिया लागिं ई मफुगु जुयाः मेम्हेसित संयोजक दयेकेमाःगु खँ धाःगु दु। तर मेपिं दुजःतय्सं धाःसा मुलुकया मू एजेण्डा धइगु हे संविधान दयेकेगु जूगुलिं प्रचण्डं मेगु ज्यायात बरु त्वःताः जूसां संविधान च्वयेगु ज्यायात प्राथमिकता बीमाः धकाः माग सः तःगु दु ।
