यलय् आइतवाः अजूचायापुगु पायो पिहां वइगु

यल (सन्ध्या टाइम्स)/येँय् मोहनिबलय् पायो पिहां वइगु ला सकस्यां सिउगु हे खँ खः। तर यलया सुबाहालय् च्वंपिं ज्यापु समुदाय दथुइ सी गुथिया मू थकालि आजुं लुइगु ई जुल कि पायो पिहां वइगु धाःसा यक्वस्यां मसिउनिगु संस्कृति खः। थ्व पायो थुगुसी थ्वहे वइगु आइतवाः पिहां वइगु जुयाच्वंगु दु ।

थ्व ज्या सुबाहाःया दुने च्वंगु ननीइ जुइगु खः। तर अन पायो पिहां वयेगु धकाः पूर्व निर्धारित कथं वइगु धाःसा मखु। सी गुथिया दुजः भाजु कृष्णलाल महर्जनं कनादी कथं ननीइ पुजा यायां हे सी गुथिया दुजःत मध्ये छम्ह आकाझाकां थरर्र खाना वइ। वयां लिपा हानं मेम्ह नं खाना वइ। थुकथं खुम्ह तक खाना वइ। अले उमित ज्वनाः तुं चुकय् न्हूम्ह आजु लुइम्हेसिगु छेँय् यंकी। अन उमित थीथी कथंया ज्वलं ज्वंकाः पित हइ। पिने उमित मनूतय्सं बाजं थानाः, सुलि पुयाः हीमी चायेक हायेकाच्वंगु दइ। उकथं हे हायेकु हायेकुं उमित ननि छचाः चाःहीकाः हानं तुं चुकय् तुं यंकी। अन उमित पुजा याइ। उमिसं च्यानाच्वंगु धुं धुपाँय् चुंचुं जुइक नया बी। अले खायेगु नं त्वःती ।

थ्व ज्या आइतवाः न्हिनय् ३-४ बजेपाखे जुइ। उगु इलय् सुबाहालय् सुनां नं झ्यालय् पर्सी, पेटिकोट, कट्टु थेंज्याःगु वसः पाये मजिउगु, झ्यालं ई, खै फाये मजिउगु, छ्यंगूया लाकां वा पेटी न्ह्यानाः वये मजिउगु खँ नं वय्कलं कनादिल। छुं मजिउगु ज्या जुल धाःसा पायो वःपिंसं थःके ल्हातय् दुगु ल्वाभलं पालेगु ज्या समेत यायेफु धाःगु दु। अथे हे उमित हायेकल वा उमिसं ज्वना वःगु ल्वलं थीगु कुतः यात धाःसां नं उमिसं आक्रमण यायेफु। उमिसं आक्रमण यायेगु ल्याखं थम्हं ज्वना वःगु ढाल वा खुकुरीं थि जक थिल धाःसां नं थिउम्ह मनूयात मभिं जुइगु विश्वास दु। उकिं पायो पिहां वइबलय् उमिगु न्ह्यःने मिसा, मचा, बुराबुरित मवःसा जिउ धकाः नं गुथियार महर्जनं कनादिल। थुकिया बारे बहालय् सुचं हे तिकी तिनिगु खँ नं वय्कलं कनादिल। थ्व स्वयां प्यदँ न्ह्यः नं थथे हे पायो पिहां वःगु खः ।