तनावया दथुइ संवैधानिक समितिया बैठक स्थगित
राज्य पुर्नसंरचनाया बारे सहलह जुयाच्वंगु संवैधानिक समितिया मुँज्याय् तनाव जुइवं कन्हय् तकया निंतिं मुँज्या स्थगित याःगु दु ।
दलित, मुस्लिम व जनजातितय् सभासद्तय्सं थःपिंतं न्वावायेत पर्याप्त ई मब्यूगु धासें विरोध यायेवं समितिया सभापति निलाम्बर आचार्यं मुँज्या स्थगित यानादीगु खः । मुँज्याय् संघीय लोकतान्त्रिक राष्ट्रिय मञ्चया रुक्मणी चौधरी, दलित जनजाति पार्टीया विश्वेन्द्र पासवान व स्वतन्त्र सभासद् सदरुल मिया हकं तःधंगु दलतय्त न्ववायेत जक अप्व ई ब्यूगु धासें विरोध याःगु खः ।
स्वम्ह सभासद्तय्सं मुस्लिम, दलित व जनजातितय्त हेपे यानाः पर्याप्त ई मब्यूगु धासें ल्यूने लाःपिं, सिमान्तकृत लगायत समुदायया मुद्दा प्रतिवेदनय् दुथ्याकूसाः जक मुँज्या संचालन यायेबीगु ख्याच्वः ब्यूगु खः ।
संविधानसभा दुने विवादीत विषय मध्ये छगू राज्य पुर्नसंरचानाया खः । विवादया हुनिं हे ताः ई निसें थुकि सहलह जूसां छुं सहमति जुइमफुनी ।
