अर्थमन्त्रीपाखें लेखा समितिया निर्देशनया अवज्ञा
अर्थ सचिव रामेश्वर खनालया राजीनामा प्रकरणयात कयाः न्यनेकने यायेत व्यवस्थापिका संसदया सार्वजनिक लेखा समितिं थौं सःतुगु मुँज्याय् अर्थमन्त्री भरतमोहन अधिकारी उपस्थित जुयामदी ।
अर्थमन्त्री अधिकारीया दबाव लिपा अर्थ सचिव खनालं बाध्य जुया राजीनामा ब्यूगु बुखँ सार्वजनिक जुइवं लेखां अर्थमन्त्री नापं मुख्य सचिव माधव घिमिरे व राजश्व सचिव कृष्णहरि बास्कोटायात स्पष्टिकरणया निंनिं थौं सःतुगु खः ।
मन्त्री अधिकारीं राजश्व सचिव मार्फत थः कार्यव्यस्तताया हुनिं मुँज्याय् उपस्थित जुइमफइगु सूचं छ्वःगु खः । लेखा समितिया मुँज्याय् मुख्यसचिव व राजश्व सचिव जक उपस्थित जुइवं समितिया सभापति रामकृष्ण यादवं कन्हय् तकया निंतिं मुँज्या स्थगित यानादिल ।
सुथय् ८ बजे सःतुगु उगु मुँज्याया इलय् अर्थमन्त्री अधिकारी धाःसा माओवादी नायः पुष्पकमल दाहाल 'प्रचण्ड'नाप खँल्हाबंला यायेत न्हू बजार थ्यंकादीगु खँ सीदुगु दु ।
थौंया मुँज्याय् अर्थमन्त्री उपस्थित मजुइवं सभासद्तय्सं अर्थमन्त्रीं समितिया उजं उल्लंघन याःगु धासें आलोचना याःगु खः । समितिं मन्त्री अधिकारी नापं मुख्यसचिव व राजश्व सचिवयात कन्हय्या मुँज्याय् उपस्थित जुइत हानं निर्देशन जारी याःगु दु ।
