अर्थ सचिवया राजीनामायात कयाः सरकारया लिसः माग
नेपाली कांग्रेसं अर्थसचिव रामेश्वर खनालं राजीनामा ब्यूगु प्रकरणय् सरकारया लिसः माग यानाः बुधवाःया व्यवस्थापिका संसदया बैठक अवरुद्ध याःगु दु ।
संसदया बिशेष इलय् न्वानादिसें कांग्रेस प्रमुख सचेतक लक्ष्मण घिमिरें सचिव खनालं दबावय् राजीनामा ब्यूगु धासें थुकिया लिसः प्रधानमन्त्रीं संसदय् बिइमाःगु माग यानादीगु खः ।
कांग्रेसं प्रधानमन्त्रीं थुगु प्रकरणया बारे संसदय् लिसः मब्यूतले संसदया बैठक न्ह्याकेमबीगु अडान कायेवं थौंया बैठक कार्यसूची प्रवेस मयायेकं स्थगित याःगु खः । घिमिरें न्ववाये सिधेवं कांग्रेस सभासद्तय्सं थौंया बैठकया कारवाही मन्ह्याकेत इनाप यासें सभाकक्षं पिहांवंगु खः ।
थ्वस्वयां न्ह्यः एमालेया रवीन्द्र अधिकारी, नेकपा (एकीकृत)या परी थापालगायतं नं न्ववानादिसें सचिवया राजीनामाया वास्तविता पिने हयेमाःगु माग यानादीगु खः । संसदया मेगू बैठक १८ गते शुक्रवाः च्वनीगु जूगु दु ।
थ्वहे दथुइ थौं च्वंगु सार्वजनिक लेखा समितिया बैठकं अर्थमन्त्री भरतमोहन अधिकारी, मुख्य सचिव माधवप्रसाद घिमिरे व राजश्व सचिव कृष्णहरि बाँस्कोटायात बिहीवाः स्पष्टकरण बिइत सःतुगु दु ।
नक्कली भ्याट बिल छानबिन यानाच्वंगु इलय् हस्तक्षेप याःगु धासें अर्थ सचिव खनालं राजीनामा ब्यूगु खँ सार्वजनिक जुइवं समितिं स्वम्हेसित सःतुगु खः ।
