नेवाः व तामाङ दथुइ सद्भाव तुच्चा
येँ (सन्ध्या टाइम्स)/ संघीय नेपालय् जःलाखःला जुयाः च्वनेमाःगु निगू प्रदेश नेवाः व ताम्सालिङ दथुइ स्वापू बांलाका तयेगु ताः तयाः म्हिगः नेवाः स्वायत्त राज्य मंकाः संघर्ष समिति व ताम्सालिङ स्वायत्त राज्य संयुक्त संघर्ष समितिया मंकाः सद्भाव मुँज्या जुल ।
नेवाः स्वायत्त राज्य मंकाः संघर्ष समितिं सःतूगु उगु सद्भाव बैठकय् निगुलिं जातिया संघर्ष समितिया पदाधिकारीतय् म्हसीका बीगु लिसें थवंथवय् मिले जुयाः न्ह्याः वनेमाःगु विषयय् सहलह जूगु खः । संघर्ष समितिया वर्तमान नायः नरेशवीर शाक्यया सभापतित्वय् जूगु उगु ज्याझ्वलय् सचिवालयया संयोजक मल्ल के. सुन्दरं निगू प्रदेशया सीमा विवाद समाधान यायेत लछि न्ह्यः जूगु सम्झौता बारे कनादीगु खः ।
उगु सम्झौताय् निगुलिं संघर्ष समितिं थःथःपिनि कार्यदल दयेकाः सीमा सम्बन्धी विवाद समाधान यायेगु खँ उल्लेख जुयाच्वंगु दु । सहमति कथं नेवाःपाखें मल्ल के. सुन्दर, दिलबहादुर श्रेष्ठ (माओवादी), डा. कुसुम शाक्य (नेकां), व राजेन्द्र श्रेष्ठ (एमाले) दुथ्याःगु कार्यदल दयेकूगु दु । अथे हे तामाङपाखें परशुराम तामाङ, कमानिसं लामा (माओवादी), शान्ति पाख्रिन (एमाले) व देवराज लामा (राष्ट्रिय जनमुक्ति) दुथ्याःगु कार्यदल दयेकूगु दु ।
थौं बुधवाः निगुलिं कार्यदलया न्हापांगु मंकाः बैठक च्वनेत्यंगु दु । बैठकं थिनं लिछ न्ह्यः तयार याःगु सहमतिया लिधंसाय् सीमा सम्बन्धी विवाद ज्यंकेगु ज्या याइ धाःगु दु ।
