कमिटी भंग : आः संयोजक जुइगु खँय् ल्वाप
येँ (सन्ध्या टाइम्स)/ थः मजदूर संगठनतय् दथुइ जुयाच्वंगु ल्वापु लिपा वनाः सांघातिक हमलाय् थ्यंक विस्तार जुयावंगुलिं अन्ततः माओवादीं स्वंगुलिं हे मजदूर कमिटी भंग याना बिउगु दु । तर संगठन भंग यानाः मजदूर दथुया ल्वापु धाःसा अझ नं समाधान जुइ फयाच्वंगु मदुनि । स्वंगुलिं समानान्तर कमिटी भंग यानाः पार्टी आः छगू हे राष्ट्रिय सम्मेलन आयोजक समिति गठन यायेगु धकाः निर्णय ला याःगु दु । तर उगु आयोजक समितिया प्रमुख सु जुइगु धइगु खँय् धाःसा अझ नं विवाद दनिगु खँ धाःगु दु ।
राष्ट्रिय आयोजक समिति गठन यानाः संयोजक तोके यायेसातकि हानं ल्वापु जुइ धकाः पार्टीं आयोजक समिति गठन याये मफुगु खँ धाःगु दु । स्वंगू समानान्तर समितित भंग याःगुलिं आः स्वंगुलिं हे समितिया प्रमुखतय्सं आयोजक समितिया संयोजक नं दावी यायेफुगु खँ धाःगु दु ।
म्हिगः च्वंगु माओवादी स्थायी समितिया बैठकं अध्यक्ष प्रचण्ड पक्षधर शालिकराम जमकटेल, उपाध्यक्षपिं मोहन वैद्य पक्षधर बद्री बजगाई व डा. बाबुराम भट्टराई पक्षधर लालध्वज नेम्बाङया नेतृत्वय् गठन यानातःगु समानान्तर मजदूर कमिटीत भंग याःगु खः । स्वम्हं नेतातय् सहमतिइ थ्व भंगया निर्णय जूगु खः ।
