नवानिइ कर्मचारी हडतालया तयारी
येँ (सन्ध्या टाइम्स)/ नेपाल वायुसेवा निगमया कार्यकारी अध्यक्ष केबी लिम्बुं पूर्व अध्यक्ष सुगतरत्न कंसाकार पक्षधर थें च्वंपि कर्मचारीतय्त स्पष्टीकरण कायेगु व सरुवा यायेगु ज्या न्ह्याकूगुलिं वय्कःया विरुद्ध कर्मचारीतय्सं आन्दोलनया तयारी यानाच्वंगु खँ सीदुगु दु । लिम्बुयात
निगमया माओवादी कर्मचारीतय्सं साथ बियाच्वंगुलिं लिम्बुं मनोमानी यानाच्वंगु खँ धाःगु दु ।
उखे पूर्व अध्यक्ष सुगतरत्न कंसाकारं एअरबस कम्पनीयात बियाछ्वःगु बैना दां लिहां वःगु बारे आधिकारिक पौ च्वयाः जानकारी बिउ धकाः विशेष अदालतं निक्वः तक पौ छ्वया हलं नं लिम्बुं लिसः मबिसे तयातःगु खँ सीदुगु दु । थुकिं यानाः अदालतय् न्ह्यानाच्वंगु मुद्दा अनावश्यक रुपं ताःहाकः जुया वनाच्वंगु दु । वंगु विहीवाः निगमया पौ थ्यंकः मवःगु कारणं आः कन्हय् विहीवाः हानं मेगु पेशी तयातःगु दु । लिम्बुं बैना छ्वःगु दांया ब्याज मवःनि धइगु कथंया पौ अदालतयात बीत स्वयाच्वंगु व उकिया लागिं हिसाब पिकायेकाच्वंगु खँ धाःगु दु ।
