सरकारी गाडी लित कायेत लेखाया निर्देशन

व्यवस्थापिका संसद अन्तर्गतया सार्वजनिक लेखा समितिं पुलांपिं मन्त्री व सरकारी पदाधिकारीतय्सं कानुन विपरित छ्यलाः वयाच्वंगु सरकारी गाडी लित कायेत सरकारयात निर्देशन ब्यूगु दु । अथेहे लेखां गाडी नापं सुरक्षाकर्मी पीएसओ नं छवाःया दुने लित कायेत निर्देशन ब्यूगु दु ।

लेखा समितिया बुधवाः च्वंगु मुँज्यां गृहमन्त्रालयं मापदण्ड व आधार बिना हे पुलांपिं मन्त्री व सरकारी पदाधिकारीतय्त अज्याःगु सुबिधा बियाच्वंगु ठहर यासें उगु निर्देशन ब्यूगु खः । मुँज्यां अज्याःगु निर्देशनया अवज्ञा याइपिंत कारवाही यायेत अख्तियार दुरुपयोग अनुसन्धान आयोगयात पौ छ्वयेगु निंतिं निर्णय याःगु दु ।