थौं पत्रकार महासंघया ५६क्वःगु बुदिं
नेपाल पत्रकार महासंघं थौं थःगु ५६क्वःगु बुदिं थीथी ज्याझ्वः यानाः हनाच्वंगु दु । 'शान्ति, सहमति व संविधान, नेपाल पत्रकार महासंघया अभियान' धइगु नारा थ्वयेकाः महासंघं थीथी ज्याझ्वः यानाच्वंगु दु ।
५६क्वःगु बुदिंया लसताय् बुधवाः सुथय् महासंघं येँय् प्रभातभेरी यात । येँया भृकुटीमण्डपं सुरु जूगु प्रभातफेरी शहिदगेत, न्हू सतक, वीर अस्पताल, रत्नपार्क जुया हानं भृकुटीमण्डपय् वयाः क्वचाःगु खः ।
प्रभातफेरी लिपा भृकुटीमण्डपय् कोणसभा जुल । कोणसभाय् महासंघया नायः धर्मेन्द्र झा, नेपाल बार एसोसिएसनया नायः प्रमेबहादुर खड्का लगायतं सम्बोधन यानादीगु खः ।
थौं हे महासंघं न्हिनय् नेपाल प्रज्ञा प्रतिष्ठानय् तुच्चा ज्याझ्वः यायेत्यंगु दु । उगु ज्याझ्वलय् महासंघया संस्थापक सभापतिया नांमं निस्वंगु 'कृष्णप्रसाद भट्टराई पत्रकारिता सिरपा' नं बीगु ज्याझ्वः दु । छगू लख तकया उगु सिरपा थुगुसी वरिष्ठ पत्रकार किशोर नेपालयात बिइत्यंगु दु ।
News Location:
