उपसमितिया म्याद हानं थपे यात
न्हूगु संविधान निर्माणया झ्वलय् खनेदुगु विवाद समाधान यायेत संवैधानिक समिति अन्तर्गत निस्वंगु उपसमितिया म्याद हानं थप याःगु दु । फागुन १३ गते एनेकपा (माओवादी)या नायः पुष्पकमल दाहाल 'प्रचण्ड'या नेतृत्वय् गठन याःगु उपसमितिया म्याद फागुन मसान्तय् क्वःचायेवं उकिया म्याद न्हापांगु खुसिइ चैत १५ गते तकया निंतिं थप याःग खः ।
संविधानसभा अन्तर्गत शासकीय स्वरुप, निर्वाचन प्रणाली व राज्य पुर्नसंरचना बारे दलत दथुइ अझ सहमति जुइ ल्यँ दनीगुलिं उपसमितिया म्याद वैशाष १ गते तकया निंतिं थप याःगु खः ।
उपसमितिं संविधानसभाय् खनेदुगु थीथी विवादीत विषयलय् सहमति याःसां शासकीय स्वरुप, निर्वाचन प्रणाली व राज्य पुर्नसंरचनाया बारेया विवाद ज्यंकेमफुनी । संवैधानिक समितिया सभापति निलाम्बर आचार्यं थप याःगु ईया दुने उपसमितिं ल्यँ दनीगु विवादीत विषयलय् सहमति याइगु विश्वास प्वंकादिल ।
थौं च्वंगु समितिया मुँज्याय् सर्वसम्मतिं उपसमितिया म्याद थप यायेगु निर्णय याःगु खः । तर समितिया संयोजक जुयाच्वंम्ह माओवादी नायः प्रचण्डं धाःसा थः हानं संयोजक मजुइगु धासें उगु पदय् माओवादी न्वकू नारायणकाजि श्रेष्ठ 'प्रकाश'या नां प्रस्ताव यानादीगु खः ।
तर वय्कःया उगु प्रस्तावय् मेमेगू दलया नेतातय्सं विरोध यायेवं सु संयोजक जुइगु बारे क्वःछिमफुत । कन्हय् च्वनीगु समितिया मुँज्यां संयोजकया बारे निर्णय याइगु धाःगु दु ।
