सरकारयात याकनं पूर्ण आकार बीगु
नेकपा (एमाले)या नायः झलनाथ खनालया नेतृत्वय् गठन जूगु सरकारयात याकनं पूर्ण आकार बीगु सहमति निगू तःधंगु वाम दल दथुइ जूगु दु ।
सोमवाः एनेकपा (माओवादी) व एमाले दथुइ प्रधानमन्त्री निवास बालुवाटारय् जूगु खँल्हाबंलाय् मधेशी जनअधिकार फोरमयात सरकारय् दुथ्यकाः याकनं हेपूर्णता बीगु सहमति जूगु खः ।
निगू दलया बैठकय् बजेटया बारे नं सहलह जूगु खः । सहलहया झ्वलय् प्रधानमन्त्री झलनाथ खनालं म्हो ई जक दुगुलिं आः पूरक बजेटया पलेसा पूर्ण बजेटय् हयेमाःगु खँय् बः बियादीगु खः ।
अथेहे उर्जा संकट समाधान यायेगु निंतिं प्यदँया कार्ययोजना सम्बन्धि विधयेक न्ह्यब्वयेगु खँय् निगू दल सहमत जूगु दु । नापं तराई क्षेत्रय् अप्वयावंगु हिंसात्मक गतिविधियात नियन्त्रणय् कायेत सुरक्षा व्यवस्था क्वातुकेगु सहमति नं जूगु दु ।
खँल्हाबंलाय् प्रधानमन्त्री झलनाथ खनाल, उप-प्रधानमन्त्रीत कृष्णबहादुर महरा व भरतमोहन अधिकारी, माओवादी नायः पुष्पकमल दाहाल 'प्रचण्ड' वरिष्ठ न्वकू मोहन वैद्य लगायतया ब्वति दुगु खः ।
News Location:
