मन्त्रिमण्डल विस्तारय् हानं कचवं
येँ (सन्ध्या टाइम्स)/मधेसी जनअधिकार फोरम छगू नं दुहां वल धाःसा दुई तिहाई बहुमत खाः वनीगु सरकारय् फोरम दुहां वनेगु मामिलाय् हानं विवाद पिहां वःगु दु। फोरमयात ग्वःगू मन्त्रालय बीगु धइगु खँय् पिहां वःगु विवादं यानाः सरकारयात पूर्णता बीगु ज्या हानं लिबानाच्वंगु खः ।
सूत्रतय्सं बिउगु जानकारी कथं फोरमयात बीगु धकाः सरकारं स्वंगू मन्त्रालय भाग तयातःगु खःसां फोरमं आः वयाः प्यंगू मन्त्रालय माग याःगुलिं हानं विवाद पिहां वःगु खः। सरकारं फोरमयात स्वंगू व तमलोपा-नेपाल यात छगू मन्त्रालय बीगु धकाः बिचाः यानाच्वंगु खः। तर फोरमं थःत बी धकाः छुटे यानातःगु परराष्ट्र मन्त्रालय त्वःताः जूसां उर्जा, स्थानीय विकास, आपूर्ति व भौतिक योजना थेंज्याःगु मन्त्रालय माः धकाः माग याना हःगुलिं सरकार विस्तार यायेगु ज्या थाः वंगु खः। यादवयात स्वंगू जक मन्त्रालय ज्वंकाः थामथुम यायेगु लागिं प्रधानमन्त्री झलनाथ खनालं यादव लिसे खँ ल्हानाच्वंगु दु ।
मेखे सेना समायोजनाया खाका तयार जुइवं हे थःपिंत गृह मन्त्रालय बीमाः धकाः माओवादीं माग यानाच्वंसां एमाले दुने धाःसा माओवादीयात गुगुं हालतय् नं गृह बी दइ मखु धइगु सः हानं तसः जुया वःगु दु। तर प्रम खनालं थ्व पालय् पार्टीया मेपिं नेतातय्सं थःत न्ह्याक्व हे दवाव बिउसां नं सेना समायोजनाया मोडालिटी तयार जुइवं माओवादीयात हे गृह त्वःता बीगु धकाः मनःस्थिति दयेकादीगु खँ सूत्रं धाःगु दु ।
