जनगणनाय् नेवाः मिसापिनि भूमिका

येँ (सन्ध्या टाइम्स)/नेपालभाषा मिसा खलःया ग्वसालय् मिसा चेतना अभिवृद्धि व सशक्तीकरण कार्यक्रम अन्तर्गत वंगु चिल्लागा षष्टि व सप्तमी निन्हुयंक न्ह्यःने वयाच्वंगु राष्ट्रिय जनगणनाया विषयय् तालिम जुल। प्रशिक्षक योगेन्द्रमान श्रेष्ठं नेवाःतय् भाय्, थाय् व बाय्या बारे कँसें नेवाः भाय् जाति व संस्कृतियात तःजिक हनाः संरक्षणया ज्या मिसापिनिपाखें जक सम्भव दुगुलिं नेवाःतय् सही ल्याः पिकायेगु ज्याय् नं मिसापिनि तःधंगु ल्हाः दु धयादिल।प्रशिक्षक राधा कारंजितं लैगिंक समता, सामाजिक समावेशी सिद्धान्त व व्यवहार, नेतृत्व सीप, संचार, नेवाः मिसापिंके दयेमाःगु आत्मसम्मानया लिसें आदिवासी जनजातिया अधिकार विषयय् आइ.एल.ओ. १६९, यु.एन.ड्रिप. विषयय् कनादिल ।

राष्ट्रिय जनगणनाया लागिं निर्दिष्ठ स्वंगू लागा मध्ये येँ जिल्ला क्षेत्र नं. २ या जनसंख्या अधिकृत देवेन्द्रलाल कारंजितं कन्हय् कंस हे जुइत्यंगु राष्ट्रिय जनगणनाय् मिसा सशक्तीकरणया दृष्टिं छगू न्हूगु अवसर वःगुलिं विशेष यानाः नेवाः मिसापिंस लैगिक सचेत जुयाः स्वयेमाः धासें गणकत त्वाःबाहालय् वइबलय् सुं हे त्वःमफिक सुं दोहेरे नं मजुइक ल्याः बीत इनाप यानादिल। गणकतय्त आः मखु कन्हय् वा मधासे आः हे थौं हे थःगु ल्याः दुथ्याकेत व जःलाखलाः थःथितिपिंत नं उकथं हे ध्वाथुइकादीत नं वय्कलं इनाप यानादिल। राष्ट्रिय जनगणना कायेगु झ्वलय् संकलन जुइगु तथ्याङ्ग विवरण तथ्यांक ऐन २०१५ कथं अतिकं गोप्य जुइ धासें भाजु कारंजितं उकिं राष्ट्रिय विकास नीति व योजना दयेकेत मज्जिमगाःगु जनगणनायात सफल यायेत गणकतय्सं न्यनीगु न्ह्यसःया पाय्छि लिसः बीत नं इनाप यानादिल ।

कार्यक्रमय् सहजकर्ता कथं सुवर्ण केशरी चित्रकार, सह-प्रा. प्रेमहिरा तुलाधर व अञ्जना ताम्रकारपिंसं नेपाःया समग्र विकासय् नेवाः मिसापिनि योगदान, भाषा व साहित्य ख्यलय् भूमिका, आर्थिक व सामाजिक विकासय् मिसापिनि मंकाः सहभागिता बारे कनादीगु खः। ज्याझ्वः आदिवासी जनजाति उत्थान राष्ट्रिय प्रतिष्ठानया ग्वाहालिं जूगु खः ।