माओवादी दुने विवाद तच्वल
संविधानसभाया दकलय् तःधंगु दल एकीकृत नेकपा (माओवादी) दुने स्वंगू खेमा दथुइ विवाद तच्वःगु दु । पार्टी नायः पुष्पकमल दाहाल 'प्रचण्ड' व न्वकूपिं मोहन वैद्य 'किरण' व डा. बाबुराम भट्टराई नं नेतृत्व यानाच्वंगु स्वंगू खेमा दथुइ विवाद अप्वयावंगु दु ।
सोमवाः नायः प्रचण्ड व न्वकू वैद्य निकट मजदुर संगठनया कार्यकर्तात दथुइ ल्वापु जुइवं पार्टी दुनेया विवाद तच्वःगु प्रष्ट रुपं खनेदुगु खः । निगू खेमाया कार्यकर्ता दथुइ ख्वपय् ल्वापु जुया स्वम्ह घाःपाः जूगु खः ।
उखे सोमवाः हे प्रचण्ड व वैद्य पक्षया मुँज्या न्हू बजारय् च्वंगु खःसां उगु मुँज्याय् न्वकूपिं भट्टराई व नारायणकाजि श्रेष्ठ 'प्रकास'या धाःसा ब्वति मदुगु खः । वयाः छन्हु न्ह्यः जक भट्टराई पक्षं सानेपास्थित थःगु हे छेँय् बिस्कं भेला याःगु खः ।
बिस्कं बिस्कं भेला जुयाच्वसां माओवादी नेतातय्सं धाःसा पार्टी दुने थज्याःगु भेला जुइगु स्वभाविक जूगु प्रतिक्रिया ब्यूगु दु । माओवादी नायः प्रचण्डं पार्टी दुने भचा भचा विवाद दइगु स्वभाविक जूसां पार्टी छधि छप्पँ जुयाः न्ह्याः वनीगु दावी यानादी ।
माओवादी न्वकू भट्टराईं पार्टी दुने फुट हयेत अनेक प्रतिक्रियावदीत हावी जुयाच्वंसां थः अन्तिम इलय् तक पार्टी एकताया निंतिं कुतः यानाच्वनीगु धयादीगु दु । छुं न्हि न्ह्यः जक भट्टराईं पार्टी तछ्यात धकाः मखूगु एसएमएस सर्कूलेट जूगु खः ।
