हिंसात्मक गतिविधि दिकेत गृह मन्त्रालयया इनाप

देय्या थीथी थासय् जुयाच्वंगु बम विष्फोट लिपा गृह मन्त्रालयं हिंसात्मक गतिविधि दिकेत फुक्कसितं इनाप याःगु दु ।

गृह मन्त्रालयया प्रवक्ता जयमुकुन्द खनालं सोमवाः छगू विज्ञप्ति पिथना देय्या थीथी थासय् सार्वजनिक यातायातया साधनय् लक्षित यानाः जुयाच्वंगु बम विष्फोटया घटना प्रति थःगु ध्यानाकषर्ण जूगु खँ न्ह्यथंगु दु ।

विज्ञप्तिइ सार्वजनिक थासय् व यातायातया साधन छ्यलाः निर्दोष नागरिकतय्त भयभीत यानाः सामाजिक सद्भावय् खलल् याइगु हिंसाजन्य ज्याय् संलग्न पक्षयात तत्काल अज्याःगु गतिविधि दिकेत इनाप याःगु दु ।

मन्त्रालयं थीथी हिंसात्मक गतिविधिया बारे अनुसन्धान यायेत सुरक्षा निकाययात निर्देशन बीधुंकूगु धासें मन्त्रालयया सुरक्षा व्यवस्था प्रति आस्वस्त जुइत नं इनाप याःगु दु ।