काभ्रेय् दिकातःगु बस विस्फोट
येँ (सन्ध्या टाइम्स)/तराईया थीथी लागाय् लगातार रुपं सार्वजनिक यातायातय् बम बिष्फोटन जुयाः यक्व हे मनूत घाःपाः जुयाच्वंगु इलय् लाक्क म्हिगः काभ्रे लागां येँपाखे वयाच्वंगु छगः बसय् तकं बम बिष्फोट जूगु दु ।
काभ्रे जिल्लाय् वंगु चान्हय् छगः बसय् बम विष्फोट जूगु खः। बसय् सुं नं मदुगु इलय् विष्फोट जूगुलिं छुं नं मानवीय क्षति धाःसा जूगु मदु। कोशी पारीया सानोवाङथली गाविस वडा नं. २ लाहुरे देउराली धइगु थासय् दिकातःगु बा. २ ख ५७७१ नम्बरया उगु बसय् वंगु चान्हय् २ बजे अज्ञात मनूतय्सं बम मुइकूगु खः। बम विष्फोटं बस क्षतिग्रस्त जूगु दु। उगु बस सानोवाङथलीनिसें येँय् तक वइगु बस खः। स्थानीय विनोद माझीं धाः कथं विष्फोटनया कारणं गांया मनूत तसकं ग्याःगु दु। उकिं यानाः अन यातायात तकं बन्द जूगु दु ।
