अस्पतालं पाकिस्तानी कैदी बिसिउँ वन
येँ (सन्ध्या टाइम्स)/येँया सहिद गंगालाल ह्दय रोग केन्द्रं पाकिस्तानया छम्ह कैदी नेपाःया खुम्ह प्रहरीयात झंगः लानाः बिसिउँ वनेत ताःलाःगु दु ।
केन्द्रीय कारागारय् खोटाचलन मुद्दाय् कुनातःम्ह पाकिस्तानी नागरिक मोहम्मद जमिल वंगु चान्हय् ११ बजे गंगालाल ह्दय रोग केन्द्रं आकाझाकां बिसिउँ वंगु खः।
चैत्र ८ गते कारागारय् च्वनाच्वंगु इलय् आकाझाकां बेहोस जूम्ह जमिलयात कारागार प्रशासनं वीर अस्पतालय् वासः याके छ्वःगु खः। उकुन्हु हे वीर अस्पतालं नुगःचुया भल्भ स्यंगुलिं गम्भीर प्रकृतिया विरामी धकाः तुरुन्त हे गंगालालय् रिफर याना छ्वःगु खः। वंगु १२ गते तक सिसियूलय् तयाः जमिलयात उपचार याकातःगु खःसा थौं वयागु अप्रेसन यायेगु तयारी जुयाच्वंगु खः। प्रहरीं पाकिस्तानी नागरिक जूगुलिं छम्ह असईया कमाण्डय् न्याम्ह प्रहरीतय् पुचः जमिलया सुरक्षाय् खटे याना तःगु खः ।
म्हिगः चान्हय् ११:२५ बजे जमिल चःबिइ वने धकाः दुहां वंगु खः। तर चःबिया झ्यालं तुं तिंन्हुयाः बिसिउँ वना बिल। आः वयात प्रहरीं तीव्र ढंगं मालाच्वनागु खँ धाःगु दु।
बिसिउँ वंम्ह जमिल केन्द्रीय कारागारय् कुनातःम्ह कैदी युनिस अन्सारीया सहयोगी खः। उपिं निम्हेसितं छक्वलं ज्वंगु खः। लुमंकेबहः जू, अन्सारीयात छुं न्हि न्ह्यः तिनि जेलय् हे वयाः छम्ह भारतीय 'कन्ट्राय्क्ट किलरं' गोलीं कयेकाः स्यायेत स्वःगु खः ।
