प्रचण्डया छेँय् बाबुराम बाहेकया ज्यःनाः
येँ (सन्ध्या टाइम्स)/ एकीकृत माओवादीया उपाध्यक्ष डा. बाबुराम भट्टराईनं पार्टी तछ्यायेत्यन धकाः पिहां वःगु हल्लाया नापनापं थौं पार्टी अध्यक्ष प्रचण्डया छेँ नयाँबजारय् भट्टराई पक्षधर बाहेक मेगु निगू पक्षया नेतातय् 'ज्यःनाः कार्यक्रम' जूगु दु ।
उगु 'ज्यःनाः बैठक'य् डा. भट्टराई पक्षधर बाहेक प्रचण्ड पक्षधर व मेम्ह उपाध्यक्ष मोहन बैद्य किरण पक्षधर नेतातय्त सःतूगु खः। भारतीय राजदूत राकेश सूद माओवादीया केन्द्रीय ज्याकुथी म्हिगः न्हापांखुसी वंगु खः। वयां लिपा हे थौं डा. भट्टराई पक्षधर बाहेकया ज्यःनाः बैठक अध्यक्षया छेँय् सःतूगुलिं थुकियात स्वय्म माओवादी कार्यकर्तातय्सं तकं अर्थपूर्ण रुपं काःगु दु। 'लन्च मिटिङ' धकाः सःतूगु उगु बैठकय् पार्टीया महासचिव रामबहादुर थापा बादल, उपप्रधानमन्त्री कृष्णबहादुर महरा, युवा नेता नेत्र विक्रम चन्द विप्लव, शान्ति मन्त्री बर्षमान पुन अनन्त, हरिबोल गजुरेल, शक्ति बस्नेत नापं मेमेपिं नेतातय्त सःतातःगु दु। उगु बैठकय् भट्टराई लगायत वय्कःया पक्षधर सुं हे नेतायात धाःसा सःतातःगु मदु। प्रचण्ड व बैद्य पक्षया नेतात नापनापं इमि अंगरक्षकतय्त तकं ज्यःनाः यायेत सःतातःगु खँ सीदुगु दु ।
माओवादी पार्टी दुने थौंकन्हय् स्वंगू धार दु। पार्टीया अध्यक्ष प्रचण्ड व उपाध्यक्ष बैद्यया धार छथाय् हे लानाच्वंगु दुसा मेम्ह उपाध्यक्ष भट्टराई जक याकःचा जुयाच्वंगु दु। कार्यकर्तात नं उगु हे कथं विभाजित जुयाच्वंगु दु ।
