भट्टा अप्वयाः नालाबासी हैरान

स्वनिगलं पिनेसं लाःगु पूर्वी लागा नालाय् स्वनिगः व ख्वपया भट्टा व्यवसायीतय्सं छक्वलं आपालं भट्टा तयेगु शुरु याना हःगुलिं स्थानीय नालाबासीत हैरान जूगु दु ।

स्थानीय निकाय व प्रशासनं अन भट्टा तये मदइगु नियम किटान यानातःगु दुसां राजनीतिक पार्टी व गिरोहया प्रभावं साहु महाजनतय्सं भट्टा तयाः वातावरण प्रदुषण यायेगु ज्या शुरु जुइवं वातावरण व वर्यावरण संरक्षणया सरोकार समिति दयेकाः अप्पा भट्टा फुक्कं चीकेगु निंतिं संघर्षया ज्या न्ह्याकूगु दु। खास यानाः कृषि उत्पादनय् तःमिपिं कथं कयातःपिं नालाबासीतय् जनजीवनय् प्रत्यक्ष लिच्वः लाइगु जुयाः अन भट्टा मतयेकेगु निंतिं स्थानीय जनतां थुकथं पहल याःगु खः। मानव स्वास्थ्यय् प्रत्यक्ष लिच्वः लाइकथं चले यानातःगु थज्याःगु भट्टां छुं उच्च वर्गया आर्थिक लाभ जुइगु तर आपालं वायु प्रदुषण नापं प्रत्यक्ष लिच्वः लाकीगु खँयात ध्यानय् तयाः स्थानीय जनसमुदाय, बुद्धिजीवी, ल्याय्म्ह वर्ग, कृषक वर्ग फुक्कं सतक आन्दोलनय् कुहां वःगु खः। ख्वपय् नं न्हापा न्हापा भट्टा तःगु इलय् अथे हे स्थानीय जनतां विरोध याःगु खःसा स्थानीय जनताया हे समर्थन दुगु नेमकिपां भट्टात संरक्षण यायेगु नीति कायेवं धाःसा आः ख्वपय् सलंसः भट्टाय् द्वलंद्वः मनुखं निर्वाध रुपं थःपिनि स्वास्थ्य स्यंकाः नं रोजगार धाःसा चूलाकाच्वंगु दु ।

थौंकन्हय् नाला लागाय् तुकुचा वडा नं.२ व ३ य् जक मनकामना इँटा भट्टा उद्योग व मां भगवती इँटा भट्टा उद्योग कथं स्थापना जुयाः सञ्चालनया कुतः जुयाच्वंगु दु। अथे जुयाः नं वंगु फागुन २ गतेनिसें हे स्थानीय जनतां अन भट्टा मतयेकेगु निंतिं थीथी कथं कानुनी व गैर कानुनी संघर्ष न्ह्याका वयाच्वंगु दु। फागुन ११ गते शान्ति र्‍याली याना न्ह्याकूगु भट्टा मुक्त लागा दयेकेगु उगु अभियानया झ्वलय् नालाबासीतय्सं सर्वोच्च अदालतय् मुद्दा दायर यानाः परमादेश जारी याकेत तक ताःलाःगु दु। थथे इँटा भट्टा मतयेकेगु खँय् न्हापांखुसी थथे सर्वोच्च अदालतं परामादेश जारी याःगु खः। खास यानाः बुँज्या यानाः आपालं बाली वइगु खेतीयोग्य बुँ, स्कुल लिक्क भट्टा तयाः मानव स्वास्थ्यय् हे नकारात्मक लिच्वः लाकीगु ज्या तप्यंक हे व्यवसायी समुदाय न्ह्यचिउगुलिं अन प्रतिकार यायेमाःगु खँ सरोकार समितिया सचिव हरिदास श्रेष्ठं सन्ध्या टाइम्स यात कनादिल। वय्कलं आन्दोलन ताःलाकाः जक त्वःतेगु खँ कनादिल ।

चैत ३ गते कुन्हु सर्वोच्चया परामादेश वयेवं अन दनाच्वंगु चिम्नी भट्टाया चिम्नी नं आः अथें लानाच्वंगु दु। अन भट्टा सञ्चालन सम्बन्धी आःयात छुं नं कारवाही यायेमते धकाः सर्वोच्च अदालतं आदेश जारी याःगु खः। वातावरण तथा पर्यावरण संरक्षण सरोकार समिति नाला टुकुचाया कुतः सार्थक यायेगु ज्याय् थीथी राजनीतिक दल, बुद्धिजीवी, नागरिक समाज, व सरोकारवाला सकसियां उचित ग्वाहालि दयाच्वंगु खँ सचिव हरिदास श्रेष्ठं कनादिल ।