प्रधानमन्त्री व राष्ट्रसंघया अधिकारी दथुइ खँल्हाबंला
संयुक्त राष्ट्रसंघया राजनीतिक मामिला विभागया एसिया प्यासिफकया निर्देशक स्यामियुल टम्राटं थौं प्रधानमन्त्री झलनाथ खनालयात नापलानादीगु दु ।
नेपाःया निंतिं राष्ट्रसंघीय आवासीय प्रतिनिधी रोबर्ट पाइपर नापं प्रधानमन्त्री निवास थ्यंकादीम्ह टम्राटं शान्ति प्रक्रिया, संविधान निर्माण व सेना समायोजनया प्रगतिबारे प्रधानमन्त्री खनालनाप खँल्हाबंला यानादीगु खः ।
टम्राटं अनमिन नेपालं वनेधुंकाः सेना समायोजनया ज्यां गुकथं जुयाच्वना धइगु बारे न्ह्यसः तयादीगु खः । उगु इलय् प्रधानमन्त्री खनालं सेना समायोजन यायेगु थीथी मोडालिटि बारे सहलह जुयाच्वंगु जानकारी बियादिसें राजनीतिक दलत दथुइ छगू मोडालिटिइ सहमति यानाः ज्या न्ह्याकेगु धयादिल ।
नापलाय् ज्या टम्राटं नेपाःया सेना समायोजन व पुर्नस्थापनाय् ग्वहालि यायेत राष्ट्रसंघ न्ह्यावलें तयार जूगु धयादीगु खः ।
प्रधानमन्त्री खनालयात नापलाय् धुंकाः टम्राटं थौं हे नेपाली कांग्रेसया सभापति सुशील कोइरालायात नापलानादीगु खः । थ्वस्वयां न्ह्यः वय्कलं म्हिग एनेकपा (माओवादी)या नायः पुष्पकमल दाहाल 'प्रचण्ड'यात नापलानादीगु खः ।
News Location:
