तेह्रथुमय् नेवाः नसाः दयेकेगु तालिम
तेह्रथुमया म्याङ्लुङ्ग बजारय् नेवाः नसाः दयेकेगु तालिमया म्हिगः उलेज्या जुल । संस्कृतिविद् भाजु गणेशराम लाछिजुं छगू ज्याझ्वःया दथुइ पालचाय् मत च्याकाः ज्याझ्वःया उलेज्या यानादीगु खः ।
झीगु समाज, तेह्रथुमया ग्वसालय् न्ह्याःगु थुगु तालिम छवाःयंक जुइगु खः । ज्याझ्वलय् थीथी राजनीतिक पार्टीया प्रतिनिधितय्सं नेवाः नसाः नं छगूकथं झीगु तजिलजि हे जूगुलिं थुकियात संरक्षण यानायंकेमाःगु खँय् बः बियादिल । ज्याझ्वः झीगु समाज, तेह्रथुमया नायः भाजु रोमभक्त प्रधानाङ्गया नायःसुइ जूगु खः ।
तालिमय् थ्यंमथ्यं ४० म्हेसिनं ब्वतिकया च्वंगु दु । नेवाः पहिचान म्हसीकीगु नेवाः नसा 'चतांमरी', 'वः' लिसें थीथी नसा दयेकगु स्यनीगु जूगु दु । नेपाःया थीथी जिल्ला उदय्पुर, इटहरी लिसें भारतया सिक्किमय् नं नेवाः नसा दयेकेगु तालिम बियाझायादीपिं मय्जुपिं ईश्वरी प्रजापति व विद्या प्रजापति निम्हेसिनं हे थन नं सुथय् ११ ताः इलंनिसें न्हिनसिया ३ ताः ई तक नसाः दयेकेगु स्यनादी ।
News Location:
