राजदूत सुद पेरिस डाँडाय्
नेपाःया निंतिं भारतीय राजदूत राकेश सुद न्हापांगु खुसिइ एनेकपा (माओवादी)या मू ज्याकू पेरिस डाँडा थ्यंकादीगु दु ।
राजदूत सुद थौं भारतीय ल्याम्ह सांसदतय् पुचः सहित थ: विरुद्ध न्ह्याबलें आक्रमक खनेदुपिं माओवादी पार्टीया ज्याकूथी थ्यंकादीगु खः । उगु पुचलं माओवादी नायः पुष्पकमल दाहाल 'प्रचण्ड' सहित नेतातनाप खँल्हाबंला याःगु खः ।
भारतीय सांसदत व माओवादी नेतात दथुइ निगू देय्या आपसी हितया बारे खँल्हाबंला जूगु खः । थ्वस्वयां न्ह्यः उगु पुचलं राष्ट्रपति डा. रामवरण यादव व सभामुख सुभाषचन्द्र नेम्वाङयात नापलना खँल्हाबंला याःगु खः ।
भारतया बिजु जनता दलया कैलाशनारायण सिंह देव, सिक्किम डेमोक्रेटिक फ्रन्टया ओटी लेप्चा, भारतीय राष्ट्रिय कांग्रेसया प्रदीप माझी, भारतीय जनता पार्टीया कमलेस पासवान व सञ्जय जयसवाल नापं समाजवादी पार्टीया निरज शेखर नेपाः भ्रमणय् दी ।
