संविधानसभाया म्याद थप यायेत कांग्रेस सकारात्मक
येँ (सन्ध्या टाइम्स)/राज्य पुनःसंरचना आयोग गठन यायेत सहमत जुल धाःसा संविधानसभाया म्याद थप यायेत थःपिं सकारात्मक दुगु नेपाली कांग्रेस नेता डा. नारायण खड्कां धयादीगु दु ।
थन ग्वसाः ग्वःगु छगू ज्याझ्वलय् नवासें नेता खड्कां संविधानय् जुयाच्वंगु व्यवस्था कथं राज्य पुनःसंरचना आयोग गठन यायेमाःगु बिचाः प्वंकादीगु खः। माओवादी-एमालेया वर्तमान गठबन्धन सरकार अप्राकृतिक गठबन्धनया संज्ञा बियादिसें वय्कलं थ्व सरकारया गठबन्धन थः हे त्वाःदीगु नं दावी यानादीगु दु। 'थ्व सरकार ताः ई तक ल्यना च्वनीमखु छाय्कि माओवादीं न्हय्गू बुँदाया सहमतिया नामय् प्रम खनाल थाय् लाका काकां बहुलवादया अन्त्य यायेगु व लिपा वनाः कांग्रेसया तकं सिधयेका छ्वयेत स्वया च्वंगु' द्वपं नं वय्कलं बियादीगु दु ।
मेखे नेता खड्काया धापू अःखः एकिकृत नेकपा माओवादीया नेता सीपी गजुरेलं संविधानसभाया म्याद थप याये हे मजिउ धइगु पक्षय् माओवादी मदुगु धासें उकिया बारे पार्टीं नं आधिकारीक रुपं छुं हे निर्णय मयाःनिगु खँ धयादिल। वर्तमान सरकार न्हय्गू बुँदाया हे लिधंसाय् गठन जूगु धासें थुकी छुं नं हिउपाःया आवश्यक मदुगु नं वय्कलं स्पष्ट यानादिल ।
