७ गू बुँदाया सम्झौता अशुद्ध भावना: सिंह
येँ (सन्ध्या टाइम्स)/नेपाली कांग्रेसया महामन्त्री प्रकाशमान सिंहं एमाले व माओवादी दथुइ वर्तमान सरकार गठन याये न्ह्यः जूगु न्हय्गू बुँदाया गोप्य सहमति खारेज जुलकि जक कांग्रेस सरकारय् सहभागि जुइ फइगु खँ धयादीगु दु। नेपाल प्रेस युनियन कास्कीं ग्वसाः ग्वःगु पत्रकार भेटघाटया झ्वलय् महामन्त्री सिंहं न्हय्गू बुँदाया सहमतियात अशुद्ध समझदारीया संज्ञा बिसें अज्याःगु सम्झौता खारेज जूसां कांग्रेस नं सरकारय् वनेगु खँय् बिचाः याये फइगु वय्कलं धयादीगु दु ।
एमाले दुने खने दयाच्वंगु विवादया कारण नं व हे गोप्य सम्झौता जूगु धासें वय्कलं मन्त्रिमण्डलं पूर्णता काये मफुगु नं सम्झौता हे कारण जूगु खँ धयादिल। मन्त्रिमण्डलं पूर्णता काये मफुगुलिं संविधान च्वयेगु नापनापं मेमेगु ज्या नं न्ह्याः वने मफयाच्वंगु द्वपं बियादिसें शान्ति प्रक्रियाय् जुयाच्वंगु ढिलासुस्तीं उकिया प्रत्यक्ष प्रभाव संविधान च्वयेगु ज्याय् लानाच्वंगु बिचाः प्वंकुसे झिंनिगू बुँदाया विस्तृत शान्ति सम्झौता व अन्तरिम संविधानया भावना व मर्म कर्थ शान्ति प्रक्रियाययात तार्किक निष्कर्ष थ्यंके धुंकाः जक संविधान जारी यायेमाःगु खँय् नं बः बियादीगु दु ।
