पुलांम्ह मेयर ज्ञानबहादुर न्याइच्याइँ मंत
ख्वप (सन्ध्या टाइम्स)/नेपाल मजदुर किसान पार्टीया केन्द्रीय सल्लाहकार व ख्वप नगरपालिकाया पुलांम्ह मेयर ज्ञानबहादुर न्याइच्याई म्हिगः मंत। वय्कः ७५ दँ दुम्ह खः ।
थौं सुथय् वय्कःया छेँ भार्वाचों निसें मदुम्ह न्याइच्याइँया शवयात्रा न्ह्याकूगु दु। नेमकिपाया केन्द्रीय अध्यक्ष नारायणमान बिजुक्छेँ रोहितं वय्कःया सीम्हय् पार्टीया ध्वाँय् फायेकाः शवयात्रा शुरु याःगु खः। ख्वप देय् चाःहिलेधुंकाः वय्कःया सीम्हयात अन्तिम संस्कारया लागिं हनुमानघाट ख्वँह्रे थ्यंकूगु दु। अन वय्कःया काय रमेश न्याइच्याईँनं वय्कःया सीम्हय् मि तयाः अन्त्येष्टि याइगु ग्वसाः दु ।
२०३९ सालय् ख्वप नगर पंचायतया प्रधानपञ्च कथं निर्वाचित जुयादीम्ह किसान नेता ज्ञानबहादुर न्याइच्याइँ २०१३ सालय् नेपाल कम्युनिष्ट पार्टीया सदस्य जुइधुंकाः निसें हे किसान आन्दोलनय् न्ह्यलुवा जुयाः ज्या यानादीम्ह खः। वय्कःयात देशय् प्रजातन्त्र पुनर्वहाली जुइ धुंकाः २०४९ सालया स्थानीय चुनावय् वय्कः हाकनं ख्वप नगरपालिकाया मेयर कथं निर्वाचित जुयादीगु खः। २०२७ साल, २०४५ साल व २०६१ सालय् छसिकथं नख्खु
जेल, सेन्ट्रल जेल व धुलिखेल कारागारय् वय्कलं जेल जीवन हनादीगु दु ।
वय्कः ख्वपय् अतिकं मिलनसार व सक्रिय नेताया रुपय् कार्यकर्ता दथुइ लोकंह्वाः ।
