जनबाहाःद्यः जात्रा व्यवस्थित यायेत समिति स्वन

येँ (सन्ध्या टाइम्स)/दँय्दसं थें थुगुसी नं जनबाहाःद्यःया रथ सालेगु जात्रायात व्यवस्थित यायेत छगू व्यवस्थापन समिति नीस्वंगु दु। जात्राया रुटय् लाःगु थीथी लागाया स्थानीय क्लब व पुचःतय् प्रतिनिधिपिनि दथुइ म्हिगः जूगु छगू मुँज्यां जनबाहाःया गुरुजु नीलकाजी शाक्यया संयोजकत्वय् 'सेता मछिन्द्रनाथ रथयात्रा ११३१ व्यवस्थापन समिति' नीस्वंगु खः ।

समितिया छ्यांज्ये पदय् नेवाः जागरण मञ्चया संयोजक सुजीव वज्राचार्य च्वनादीगु दुसा दांभरि असन सेवा समितिया अध्यक्ष अमूल तुलाधर व दुजलय् लगं खलःया सुवर्णकाजी स्थापित, बाल कुमारी क्लबया पुरु वज्राचार्य, भोताहिति बजार समितिया ज्ञानेन्द्र तुलाधर, मछिन्द्र क्लबया सुनिल कपाली, इन्द्रचोक क्लबया कृष्णमान सिंह, मखन टोल सुधार समितिया सुरज, महादेव मखन क्लबया विनोद तुलाधर, खड्गी सेवा समितिया मनोज नेवाः, गंगा क्लबया दिगम्बर श्रेष्ठ, जैसीदेवल क्लबया महेन्द्र कर्माचार्य, योङ स्टार क्लबया खगेश रंजित, ज्याबहाः ल्याय्म्ह पुचःया दिव्यरत्न वज्राचार्य च्वनादीगु दु। लिसें जनबाहाःद्यः रथ यात्रा न्ह्याइगु वडाया निवर्तमान वडाध्यक्षपिं विकासभक्त श्रेष्ठ, बाबुराजा महर्जन व अमर वज्राचार्य नं दुजः कथं च्वनादीगु दु ।

समितिया सल्लाहकार कथं येँदेय्या सभासद्पिं हिसिला यमि, ध्यानगोविन्द रंजित, बुद्ध साय्मि, तीर्थराम डंगोल, ज्यापु महागुथि येँ मनपाया अध्यक्ष ई. मोहनकृष्ण डंगोल व पुलांम्ह सांसद कृष्णगोपाल श्रेष्ठ च्वनादीगु दु ।

थ्वहे वइगु चौलाथ्व अष्टमि निसें दशमि तक (चैत्र २८, २९ व ३० गते) स्वन्हु जात्राजःछि लोड शेडिङ्ग याना महयेत, जात्रा न्ह्याइगु रुटया लँ दयेकेत व जात्रा जःछि शान्ति सुरक्षा कायम यायेत सम्बन्धित निकायय् डेलिगेशन वनेगु व जात्राय् थःपिंपाखें नं स्वयसेवक परिचालन यायेगु निर्णय समितिं याःगु दु ।