स्वयम्भुइ झिंच्यासः मानन्धरतय् भ्वय्

येँ (सन्ध्या टाइम्स)/केन्द्रीय मानन्धर संघया ग्वसालय् स्वयम्भुइ थुगुसीया स्वयम्भु भ्वय् म्हिगः जुल। दँय्दसं होलि पुन्हि धुंकाःया न्हापांगु शनिवाः न्यायेका वयाच्वंगु थुगु भ्वजय् थुगुसी स्वनिगः व स्वनिगलं पिनेयापिं यानाः झिंच्यासःम्ह मानन्धरतय्सं ब्वति काःगु खः। भ्वय्या हे झ्वलय् जूगु छगू विशेष ज्याझ्वलय् थीथी व्यक्तित्वपिंत हनापौ देछायेगु लिसें सांस्कृतिक ज्याझ्वः नं जूगु खः।
केन्द्रीय मानन्धरया सभापति न्हुछेबहादुर मानन्धरया सभापतित्वय् जूगु उगु ज्याझ्वलय् थुगुसी ज्याःजंक्व क्वचायेकादीपिं ज्याथजिथिपिंत हनापौ लःल्हायेगु ज्या जूगु खः। लिसें थुगुसी इहिपा जूपिं न्हू तिपूयात नं दसिपौ लःल्हायेगु ज्या जूगु खःसा न्हू तिपूपिनि दथुइ म्युजिकल चेयर ज्याझ्वः नं जूगु खः ।

ज्याझ्वलय् मानन्धर संघया ख्वाःपौ पिकायेगु ज्याय् ग्वाहालि यानादीम्ह इन्द्रेणी अफसेट प्रेसया थुवाः ज्ञानेन्द्र मानन्धरयात दोसल्लां न्ययेकाः हनेगु ज्या नं जूगु खः। उगु हे ज्याझ्वलय् थगुनेया एसएलसी परिक्षाय् दकलय् अप्वः ल्याः हयाः पास जूम्ह रविता मानन्धर व रेशमी मानन्धरयात सिवा साय्मि खलः थिमिपाखें पदक लःल्हायेगु ज्या नं जूगु खः ।

ज्याझ्वलय् देय् थाकुलि न्हूसाः त्वाःया १०२ दँ दुम्ह इन्द्रनारायण मानन्धर व देय् नकिं दैसाः त्वाःया ९८ दँया नानीमाया मानन्धर नापं न्हय्सः नायः अमोघ नारायण मानन्धरपिनि नं उपस्थिति दुगु खः ।

संघया उपसभापति रत्ननारायण न्हूजवाः साय्मिं लसकुस यासें न्ह्याःगु उगु ज्याझ्वलय् चस्वाँद्व त्वाःया कलाकारतय्सं बाजं न्ह्यब्वःगु खः। ज्याझ्वलय् हिदान नं जूगु खः। थुगुसी थ्व भ्वय् न्यायेगु ज्या पाको पुखुद्यां मानन्धर सनां खलकं याःगु खःसा आकिवंया पाःब्व तंलाछि त्वालं काःगु दु। थगुने वँतु मानन्धर सनां गुथि पाः फःगु खः ।

ज्याझ्वलय् देय्या थीथी ख्यलय् सक्रिय जुयाः प्रतिष्ठित जुयादीपिं आपालं मानन्धरतय्सं नं ब्वति कयादीगु खः ।