'पटाचारा'या विमोचन व कलाकार हनेज्या
यल (सन्ध्या टाइम्स)/बौद्ध बाखंया लिधंसाय् दयेकूगु नेपालभाषा संकिपा 'पटाचारा'या डीभीडी म्हिगः छगू ज्याझ्वःया दथुइ पित ब्वज्या जुल। पटाचाराया मू प्याखंम्वः मदनदास श्रेष्ठ, लक्ष्मी गिरी, नेपालभाषा मंकाः खलःया छ्यांजे नरेशवीर शाक्य, नेपाल चलचित्र निर्माता संघया नायः राजकुमार राई, चलचित्र पत्रकार संघया नायः विदुर गिरी, न्वकु प्रदिप उदय, निर्देशक उज्वल घिमिरे, चलचित्र पत्रकार विजयरत्न असंबरे, चलचित्र निर्माता संघया पुलांम्ह नायः शान्तिप्रियपिंसं मंकाः कथं उकिया विमोचन यानादीगु खः ।
'पटाचार'या निर्देशक रामकृष्ण खड्गीं लसकुस यानादीगु ज्याझ्वलय् खस भाषाया चलचित्रकर्मितय्सं थौंकन्हय् हलय् सछिन्हु फिल्म चले जूगु न्यने मदयाच्वंगु इलय् नेवाः फिल्मं काःगु थ्व सफलता समग्र फिल्म ख्यःया निंतिं लसताया खँ जूगु बिचाः प्वंकूगु खः। कलाकार अशोक शर्मां कलाकारतय्त सम्मान सुनां यात धइगु सिबें नं फिल्म गथे यानाः दयेकल धइगु मू चिउताःया खँ खः धयादिल। कलाकार लक्ष्मी गिरी, मदनदास श्रेष्ठ नापं मेपिंसं फिल्मयात कयाः बिचाः प्वंकादीगु खः। निर्माता गुण फिल्मस्या अध्यक्ष दिजेन्द्र शाक्यं सभापतिया थासं थुगु फिल्मपाखें वःगु लबलं जनकपुरया छगू विहारय् बुद्ध मूर्ति प्रतिस्थापन यायेगु खँ कनादिल। ज्याझ्वलय् फिल्मया कलाकार, प्राविधिकपिंत मतिनाया चिं नं लःल्हाःगु खः। लिसें अध्यक्ष शाक्यं आः हानं मेगु बौद्ध बाखंया लिधंसाय् 'कृषा गौतमी' फिल्म दयेकेगु घोषणा यानादीगु खः। थुकिया निंतिं निर्देशन व कलाकार ल्ययेगु भाला नं रामकृष्ण खड्गीयात हे बिउगु दु ।
