नेपाःयात क्यनेगु भारतया न्हूगु कार्ड - मधेस
समाचार विश्लेषण
येँ (सन्ध्या टाइम्स)/नेपाःयात थःगु हे परिवारया दुजः तायेकीम्ह जःलाखःला भारत छगू अज्याःगु देय् खः गुकिं नेपाःया शासकत थःगु पकडं पिहां मवनेमा धकाः उमित ख्याना तयेगु लागिं न्ह्याबलें नं छगू कार्ड थःगु ल्हातय् लाका तःगु दइ। थ्व आःया जक चलन मखु। देशय् प्रजातन्त्र वये न्ह्यः राणाकालंनिसें भारतं छ्यला वयाच्वंगु थ्व 'कार्ड प्रणाली' थौं गणतन्त्र वयेधुंकाः तक नं जारी दनि।
नेपालय् राणा शासन दुबलय् भारतं तत्कालिन प्रजातन्त्रवादी नेतात वीपी कोइराला, गणेशमान सिंह आदिपिंत थःपिनि कार्ड दयेकाः छ्यःगु खः। छखे राणातलिसे स्वापू बांलाका तयेगु, मेखे राणा विरोधीतय्त हे संरक्षण बियाः उमित ख्याना नं तयेगु, ताकि राणातपाखें न्ह्यागु कथंया नं फाइदा काये फयेमा ।
२००७ सालय् प्रजातन्त्र वयेधुंकाः नेपाःयात भारतं थःगु प्रान्त थें हे दयेकल। २०१७ सालय् जुजु महेन्द्रं पञ्चायती व्यवस्था लागू यानाः भारतयात छखे लाकल। तर उगु इलय् नं भारतं छखे पञ्चायतलिसे नं स्वापू बांलाका तल, मेखे पञ्चायत विरोधी नेतातय्त थःगु देशं संरक्षण बियाः पञ्चायतयात ख्याना नं तल। अबलय् भारतं तत्कालिन बहुदलवादीतय्त भारतं कार्ड दयेकाः पञ्चायतयात ख्याना तल ।
२०४६ सालय् पञ्चायती व्यवस्था क्वःदल, बहुदलीय व्यवस्था वल।भारतं बहुदलवादीतलिसे नं स्वापू ला बांलाकल, तर बहुदलवादीतय्त ख्याना तयेगु लागिं माओवादीयात कार्ड दयेकल। माओवादी नेतात फुक्कसित थःगु देशय् संरक्षण बियाः भारतं बहुदलीय व्यवस्थाया हरेक शासकतपाखें लबः काल ।
२०६३ सालय् वयाः गणतन्त्र वल, माओवादीत हे सत्ताय् वल। थ्व इलय् भारतं मधेसवादीतय्त कार्ड दयेकूगु दु। आः मधेसयात न्ह्यःने तयाः गणतन्त्र नेपाःया शासकतय्त ख्यानाच्वंगु दु ।
थुकथं नेपाःया सत्ताधारीतय्त ख्यायेत भारतं न्ह्याबलें नं छगू न छगू कार्ड दयेका हे तःगु खनेदु। नेपाःया राजनीतिइ थः सदां नं भारी जुया हे च्वनेगु थ्वहे भारतया परम्परागत सूत्र जुयाच्वंगु दु ।
