राष्ट्रपतिपाखें संविधान निर्माणया बारे प्रचण्डनाप परामर्श
राष्ट्रपति डा. रामवरण यादवं संविधान निर्माणया बारे एकीकृत नेकपा (माओवादी)या नायः पुष्पकमल दाहाल 'प्रचण्ड'नाप परामर्श यानादीगु दु । थीथी राजनीतिक दलया नेतातय्त नापलाना च्वनादीम्ह राष्ट्रपति यादवं थौं प्रचण्डयात नापलाना संविधान निर्माणया प्रगतिया बारे च्यूताः प्वंकादीगु खः ।
राष्ट्रपति भवन शतिल निवासय् शुक्रवाः सुथयय् जूगु खँल्हाबंलाय् माओवादी नायः प्रचण्डं संविधान निर्माण यायेगु ज्या सकारात्मक रुपं न्ह्याः वनाच्वंगु व इलय् हे संविधान निर्माण जुइगु धयादिल ।
वय्कलं संवैधानिक समिति व उपसमितिं संविधान निर्माणय् खनेदुगु आपालं विषयलय् सहमति यायेधुंकूगु जानकारी बियादीगु खः । नापलाय् ज्याय् राष्ट्रपति यादवं शान्ति प्रक्रिया व संविधान निर्माण यायेगु ज्या गुकथं न्ह्याः वनाच्वंगु धकाः न्ह्यसः तयादीगु खँ प्रचण्डं कनादिल ।
म्हिग जक राष्ट्रपति यादवं चिधंगु दलया नेतातय्त नापलाना संविधान निर्माणया बारे खँल्हाबंला यानादीगु खः । राष्ट्रपति यादवं म्हिग राष्ट्रिय प्रजातन्त्र पार्टीया नायः पशुपति शम्सेर जबरा, नेपाल मजदुर किसान पार्टीया नायः नारायणमान बिजुक्छे, नेकपा (माले)या नायः सीपी मौनाली व नेकपा (संयुक्त)या नायः चन्द्रदेव जोशीनाप परामर्श यानादीगु खः ।
