राज्य पुर्नसंरचनाया खँ मिलेमजुइवं मुँज्या निष्कर्षबिहीन
न्हूगु संविधानय् राज्य पुर्नसंरचना गज्याःगु जुइगु धइगु बारे दलत दथुइ जुयाच्वंगु विवादं थौं नं निरन्तरता काःगु दु । संविधानसभाया राज्य पुर्नसंरचना व राज्य शक्तिया बाँडफाँट समितिं राज्य पुर्नसंरचनाया खाका न्ह्यब्वयेधुंकाः हानं पुर्नसंरचना आयोग निस्वनेमाः वा म्वाः धइगु बिषयया हुनिं थुकि थप सहमति जुइमफयाच्वंगु खः ।
संविधान निर्माणया झ्वलय् खनेदुगु विवाद ज्यंकेत निस्वंगु उपसमितिया थौं च्वंगु मुँज्याय् नं विशेष यानाः राज्य पुर्नसंरचनाया बारे सहलह जूसां आयोग निस्वनेगु खँ वयेवं छुं सहमति जुइगु मफुत । मुँज्या लिपा उपसमितिया कजि पुष्पकमल दाहाल 'प्रचण्डं' थौंया मुँज्याय् बिशेष यानाः राज्य पुर्नसंरचनाया बारे सहलह जूगु धयादिल ।
धौख्यःया धुलिखेल लज एण्ड रिसोर्टय् जूगु मुँज्याय् नेपाली कांग्रेसं संघीय प्रणाली वनेगु खःसा विशेषज्ञया राय ज्वनाः न्ह्याः वनेमाःगु धासें आयोग गठनया अडान काःगु खः । मुँज्या लिपा कांग्रेस नेतानापं उपसमितिया दुजः रामचन्द्र पौडेलं थौंया मुँज्याय् राज्य पुर्नसंरचना आयोग दयेके हेमाः धइगु थ:पिनिगु खँ स्पष्ट रुपं तयागु कनादिल । उखे मधेशवादी दलतय्सं धाःसा कांग्रेसया अडानयात तप्यंकं हे अस्वीकार यासें आःया अवस्थाय् आयोग गठनया छुं औचित्य मदुगु बिचाः तःगु खः ।
अथेहे मँज्याय् सेना समायोजन लगायत संविधान निर्माणया झ्वलय् खनेदुगु मेमेगू विवादित विषयया बारे नं सहसलस जूगु ख: । मुँज्या लिपा प्रचण्डं थौया मुँज्याय् दक्वसिनं थःथःगु आशंका स्पष्ट रुपं तःगु धयादिसें आपसी सहलह यानाः याकनं हे विवादित बुँदाय् सहमति यायेगु धयादिल ।
मेमेगू दलतय्सं थौंया मुँज्यापाखें विशेष यानाः माओवादी व कांग्रेस दथुइ अविश्वास खनेदुगु धासें निगू दल दथुइ निगू पक्षिय वार्ता आवश्यक जूगु बिचाः प्वंकूगु दु ।
