चिनियाँ सेना प्रमुख येँय्, डेढ अर्ब सैन्य ग्वहालिया घोषणा
चिनियाँ जनमुक्ति सेनाया प्रमुख चेन विङदे स्वन्हुन्यंकया नेपाः भ्रमणया निंतिं थौं येँय् थ्यंकादीगु दु ।
प्रमुख चेन नेपाःया सेना प्रमुख छत्रमानसिंह गुरुङया ब्वनाय् झिंन्याम्ह पुचःया नेतृत्व यासें येँय् झायादीगु खः । वय्कःयात रथी तोरण जंगबहादुर सिंह त्रिभुवन अन्तर्राष्ट्रिय विमानस्थलय् लसकुस यानादीगु खः ।
थौं हे चिनियाँ सेना प्रमुख चेनं नेपाःया सेनापति छत्रमानसिंह गुरुङयात नापलानादीगु दु । सैनिक मुख्यालय भद्रकालीइ जूगु नापलाय् ज्याय् निम्ह सेना प्रमुखं नेपाःया सेनायात चीनं बीगु चिनियाँ ग्वहालि सम्झौताय् ल्हाःचिं तःगु खः ।
सम्झौता कथं चीनं नेपाःया सेनायात छगू अर्ब, ४२ करोड व ९ लखया सैन्य ग्वहालि बिइगु जूगु दु । ग्वहालि कथं चीनं वीरेन्द्र अस्पतालया निंतिं मेडिकल उपकरण व दैवि प्रकोप उद्धार ज्याय् छ्यलीगु उद्धार ज्वलं बीगु जूगु दु ।
उगु इलय् निम्ह सेना प्रमुख दथुइ आपसी हित व समसामयिक विषयलय् नं खँल्हाबंला जूगु खः ।
स्वन्हुन्यंकया नेपाः भ्रमणया झ्वलय् चिनियाँ सैन्य प्रमुख चेनं राष्ट्रपति डा. रामवरण यादव, प्रधानमन्त्री झलनाथ खनाल, रक्षा मन्त्री विष्णु पौडेल लगायत उच्चस्तरीय पदाधिकारीतय्त नापलानादीगु ज्याझ्वः दु ।
(किपा : सैनिक जनसम्पर्क निर्देशनालय)
