सेनायात चीनया ग्वाहालि
येँ (सन्ध्या टाइम्स)/छुं जुयाः आः वइगु जेठ १४ गते नेपाःया न्हूगु संविधान दयेकाः पित बी मफुत धाःसा छु यायेगु धकाः प्यखेरं चिउताः जुयाच्वंगु इलय् लाक्क नेपाःया उत्तरी जःलाखःला देय् चीनया जनमुक्ति सेनाया प्रमुख भाजु चेन विङ्देया नेतृत्वय् सेनाया छगू तःधंगु पुचः थौं नेपाः वयेत्यंगु दु। चिनियाँ एअरफोर्सया छगः विमानपाखें उगु पुचः नेपाः वयेत्यंगु खः ।
थ्व चिनियाँ पुचलं नेपाःया राष्ट्रिय सेना नेपाली सेनायात करिब छगूत्या अर्ब बराबरया सैन्य ज्वलं ग्वाहालि बीगु खँ धाःगु दु। माओवादीया ग्वाहालि कयाः एमाले अध्यक्ष झलनाथ खनालया नेतृत्वय् गठित वर्तमान सरकारं चिनियाँ सरकारं नेपाली सेनायात बीगु उगु सैन्य ग्वाहालि स्वीकार यायेगु धकाः निर्णय यायेधुंकूगु दु। लुमंकेबहः जू, थ्व स्वयां न्ह्यः भारतपाखें नेपाली सेनायात वइगु सैन्य ग्वाहालि शान्ति सम्झौता विपरित धकाः माओवादीं विरोध याना वयाच्वंगु खः ।
सूत्रं बिउगु जानकारी कथं जनमुक्ति सेनाया प्रमुख विङ्देया नेतृत्वय् वइगु थ्व पुचलं नेपाली सेनायात सैन्य ग्वाहालि याःसां थःगु गहन चिउताः धाःसा माओवादी लडाकु समायोजन गय् यानाः यायेगु धइगु खँय् केन्द्रित याइ।
थ्व पुचःया मेगु सरोकार धइगु नेपालय् जुइ फुगु चीन विरोधी गतिविधि व उकियात नियन्त्रण यायेगु सवाललिसे स्वायेफु धाःगु दु। दलाई लामां राजनीतिपाखें सन्यास कायेगु धकाः नकतिनि याःगु घोषणा लिपा चीनं दयेकेत्यंगु न्हूगु तिब्बत नीतियात ग्वाहालि जुइ कथं थ्व भ्रमण याःगु खँ नं धाःगु दु ।
