हानं ध्वाँय् क्यंगुलिं सुद तम्वल

येँ (सन्ध्या टाइम्स)/भारतीय ग्वाहालिं निर्माण जूगु थीथी विकास परियोजनात स्वयेत गुल्मी वःम्ह नेपाःया निंतिं भारतीय राजदूत राकेश सुदयात अन नं माओवादी कार्यकर्तातय्सं हाकुगु ध्वाँय् क्यनेवं तम्वःम्ह भाजु सुदं नेपाःया सुरक्षा अधिकारीतय् समक्ष कडा तं प्वंकूगु दु। वय्कःयात अनया दुबिचौर गाविस व सदरमुकाम तम्सास दुहां वनेगु लागाय् निथाय् हाकुगु ध्वाँय् क्यंगु खः ।

थःत हाकुगु ध्वाँय् क्यनं नं माक्व सुरक्षा बी मफु धासें राजदूत सुदं स्थानीय प्रहरी समक्ष कडा रुपं तं प्वंकादीगु खः। थ्व हाकुगु ध्वाँय् क्यनेगु ज्यां थः तसकं लज्जित जुयागु खँ कँसें राजदूत सुदं थःत गुल्मीइ सःताः अपमानित याःगु बिचाः समेत प्वंकादिल। लिसें वय्कलं यदि माओवादी लगायत थीथी दलतय्सं जानाः थःत थज्याःगु ज्या याये मखु धकाः लिखित पौ मबीगु खःसा नेपाःया थीथी विकास निर्माणय् भारतं बिया वयाच्वंगु ग्वाहालिया दां बन्द याना बीगु ख्याच्वः समेत बियादीगु खः। जिल्लाय् राकेश सुद वइगु जुल धायेवं म्हीग हे सीडीओं माओवादी लगायत थीथी पार्टीया प्रतिनिधित सःताः राजदूत विरुद्ध छुं नं ज्याझ्वः मयायेगु धकाः सहमति दयेकूगु खः। तर माओवादीं धाःसा राजदूत वयेवं म्हीगु तिनि जूगु उगु सहमतियात वेवास्ता यासें हाकुगु ध्वाँय् क्यनाः नाराबाजी समेत याःगु खः ।