परराष्ट्र नीति बारे नेपाः पार्टीया अन्तर्क्रिया
येँ (सन्ध्या टाइम्स)/नेपाः राष्ट्रिय पार्टीपाखें नेवाः स्वायत्त राज्यया निर्माण लिपा व वर्तमान इलय् नेवाःतय् विदेश नीति छु दु धइगु विषयय् छगू अन्तर्त्रि्कया यात।
पार्टीया थःगु हे ज्याकुथी जूगु उगु अन्तर्क्रियाय् पुलांम्ह सांसद नापं परराष्ट्रविद् हिरण्यलाल श्रेष्ठं समसामयिक विश्व राजनीतियात कयाः बिचाः तयादीगु खः ।
पराराष्ट्रविद् श्रेष्ठं ततःधंगु देशं चिचीधंगु देशयात न्ह्याबलें नं दुःख बीत स्वइगु व उपनिवेशवाद लागू यायेत स्वइगुलिं चिचीधंगु देशतय्सं मेमेगु ततःधंगु देशं हस्तक्षेप याइगु मयेकूगु खँ कनादिल। थुकिया लिसें वय्कलं चिचीधंगु देशयात नं हस्तक्षेप स्वीकार मजूगु खँ कनादिल ।
आः नकतिनि हे लिबियाय् अमेरिकाया नेतृत्वय् जूगु आक्रमणयात कयाः न्ववासें वय्कलं धयादिल, 'लिबियाय् पश्चिमातय्सं प्रायोजित आन्दोलन याकूगु खः, तर इजिप्टय् थें थ्व आन्दोलन सफल जुइगु सम्भावना खने मदयेवं अमेरिकां छक्वलं थज्याःगु आक्रमण याःगु खः ।'
लिबियाय् आक्रमण यायेगु धकाः राष्ट्र संघीय सुरक्षा परिषद्य् मतदान जूबलय् चीनं छाय् विरोध मयाःगु धइगु छगू न्ह्यसःया लिसलय् वय्कलं धयादिल, 'अमेरिकायात इराक व अफगानिस्तानय् थें लिबियाय् नं तक्यंकाः थः विश्वया एक नम्बर अर्थतन्त्र दुगु देश जुइगु लागिं जुइफु।'
अन्तर्क्रियाय् परराष्ट्र नीतियात कयाः वय्कःया बिचाःयात कयाः सहभागीतय्सं थीथी न्ह्यसःत न्यंगु खःसा वय्कलं सकसिगुं न्ह्यसःया लिसः नं बियादीगु खः ।
