'पटाचारा'या डीभीडी
येँ (सन्ध्या टाइम्स)/बौद्ध बाखंया लिधंसाय् निर्माण जूगु नेपालभाषाया लोकंह्वाःगु संकिपा "पटाचारा" या डीभीडी नं पिहां वइगु जूगु दु
।
नेपालभाषाया इतिहासय् हे न्हापांखुसी नेपालभाषा, खस नेपाली व अंग्रेजी स्वंगुलिं भाषा दुथ्याकाः निर्माण यानातःगु संकिपा 'पटाचारा' या डीभीडी थ्वहे वइगु बिहीवाः (१० गते) कुन्हु पितब्वज्या जुइगु खँ सीदुगु दु ।
गुण फिल्म्स प्रा.लि.पाखें दयेकूगु थुगु संकिपाया निर्देशन रामकृष्ण खड्गीं यानादीगु खःसा संकिपाय् मेलिना मानन्धर, कर्म शाक्य, मदनदास श्रेष्ठ, लक्ष्मी गिरी, अन्नपूर्णेश्वरी लगायतया कलाकारतय्सं अभिनय यानादीगु दु। चलन चल्तीया स्वंगुलिं भाषा दुथ्याकातःगु थुगु डीभीडी स्वकुमितय्सं थःत छु भाषा खः वहे भासं स्वये फइगु खँ धाःगु दु। थज्याःगु सुविधा तयाः छुं नं फिल्मया डीभीडी पिकाःगु थ्वहे न्हापांखुसी खः। हाइटेक इन्टरटेनमेन्ट प्रा.लिं. थुगु डीभीडी बजारय् हयेत्यंगु खः।
सरकारपाखें आयोजित थगुने जूगु राष्ट्रिय फिल्म महोत्सवय् थ्व संकिपां दकलय् बांलाःगु नेपाः फिल्म, दकलय् बांलाःम्ह निर्देशक व दकलय् बांलाःम्ह हिरोइनया सिरपाः त्याकूगु खः। ग्वार्कोया गुण सिनेमा हलय् थ्व फिल्म सछिन्हु स्वयां अप्वः चले याःगु खः ।
