माओवादी, एमाले व फोरम दथुइ सहमति, फोरम सरकारय् वनीगु
सत्तारुढ एकीकृत नेकपा (माओवादी) व नेकपा (एमालें) मधेशी जनअधिकार फोरमनाप प्यंगू थीथी शीर्षकय् सहमति यायेवं फोरम झलनाथ खनाल नेतृत्वया सरकारय् वनीगु जूगु दु ।
प्रधानमन्त्री निवास बालुवाटारय् बुधवा: स्वंगू दलया मू नेतात दथुइ तराई-मधेश, संविधान निर्माण, शान्ति प्रक्रिया व सत्ता साझेदारीया विषयलय् सहमति जूगु खः । सहमतिपत्रय् प्रधानमन्त्री झलनाथ खनाल, माओवादी नायः पुष्पकमल दाहाल 'प्रचण्ड' व फोरम नायः उपेन्द्र यादवं ल्हाःचिं तयादीगु दु ।
सहमतिपत्रय् आत्मनिर्णयया अधिकार सहिमत स्वायत्त मधेश प्रदेशलगायत फुक्कं प्रदेशतय् स्थापना सम्बन्धी निर्णय संविधानसभापाखें यायेगु, समावेशी चरित्रया संघीय लोकतान्त्रिक गणतन्त्र संविधानसभापाखें इलय् हे निर्माण यायेमाःगु, विस्तृत शान्ति सम्झौता व न्हापा जूगु सहमतिया लिधंसाय् शान्ति प्रक्रियायात यथाशीघ्र पूर्णता बीगु लगायतया सहमति जूगु दु ।
