प्रधानमन्त्री व विदेशी कुटनीतिक दथुइ खँल्हाबंला
प्रधानमन्त्री पुष्पकमल दाहाल 'प्रचण्ड' व नेपालय् दुगु प्रमुख कुटनीतिक तथा दातृ निकायया प्रतिनिधित दथुइ सोमवाः खँल्हाबंला जूगु दु ।
सरकारया ब्वनाय् प्रधानमन्त्री निवास थ्यंकूपिं कुटनीतिक नियोगया प्रतिनिधितय्सं शान्ति प्रकृया प्रति गम्भिर च्यूताः प्वंकूगु खः । उकीया लिसलय् प्रधानमन्त्री प्रचण्डं शान्ति प्रकृयाय् छुं छुं समस्या खनेदुगु खसां सहमतिया आधारय् थ्व याकनं हे समाधान यायेगु धयादिल । वयेकलं शान्ति प्रकृया प्रति माओवादी प्रतिबद्ध जुगुलिं थुकी विश्वस्त जुइत कुटनीतिक नियोगया प्रतिनिधितय्त इनाप यानादिल ।
अथेहे नकनिति सार्वजनिक जूगु प्रधानमन्त्री प्रचण्डया भिडियो टेप बारे नं कुटनीतिक नियोगया प्रतिनिधितय्सं च्यूताः प्वंकूगु खः । थुकीया लिसलय् प्रधानमन्त्री प्रचण्ड उगु भिडियो लिपाः यक्व खँ हिले धुंकूगु व उगु भिडियो टेपया आः छुं महत्व मदुगु धासें उकीयात विश्वास मायायेत इनाप यानादिल ।
प्रधानमन्त्री निवास बालुवाटारय् जूगु खँल्हाबंलाय् शान्ति प्रकृया, प्रधानमन्त्री प्रचण्डया भिडियो प्रकरण, आर्थिक ग्वहालि लगायतया खँय् सहलह जूगु जानकारी खँल्हाबंला लिपाः अर्थमन्त्री डा. बाबुराम भट्टराईं बियादिल ।
खँल्हाबंलाय् कुटनीतिक प्रतिनिधितय्सं नेपाल विकास मंचया बैठक स्थगित जूगुलिं दुःख प्वंकादिल । लिसःलय् अर्थमन्त्री भट्टराईं न्हूगु सरकारं आः वइगु सेप्टेम्बर वा अक्टोबरय् उगु बैठक याइगु जानकारी बियादिल ।
थौं हे विदेशी कुटनीतिक नियोगया प्रतिनिधितय्सं कांग्रेस सभापति गिरिजाप्रसाद कोइराला नाप नं नापलानादीगु दु । प्रधानमन्त्री नापया खँल्हाबंला लिपाः कोइराला निवास महारजगंजय् थ्यंकूपिं प्रतिनिधितय्सं देय्या लिपांगु राजनीतिक घटनाक्रम प्रति च्यूताः प्वंकूगु खः । लिसःलय् सभापति कोइरालां समस्या ज्यंकेत याकनं हे माओवादी अध्यक्ष प्रचण्ड व एमाले अध्यक्ष झलनाथ खनाल नाप च्वनाः सहलह यायेगु जानकारी बियादिल ।
