टाइगर टप्स गोलीकाण्डया मुद्दाया पेशी वैशाख १४ गते
चितवनया मेघौलीस्थित टाइगर टप्स होटलय् जूगु गोलीकाण्डया मुद्दाया पेशी वैशाख १४ गतेतकया निंतिं लिछ्याःगु दु ।
चितवनया प्रमुख जिल्ला अधिकारी बसन्तराज गौतमं घटनाय् संलग्न पुलाम्ह युवराज पारस शाह व बंगलादेशी नागरिक रुबेल चौधरीनाप थौं बयान कायेधुंकाः उगु मुद्दाया पेशी वैशाष १४ गते यायेगु क्वःछिउगु खः ।
थौं प्रजिअ गौतमनापया बयानय् बंगलादेशी नागरिक चौधरीं घटनाया इलय् पारस शाहया ल्हातय् बन्दुक दुसां थःत सुनां गोलीं क्येकल धकाः थःम्ह मस्यूगु बयान बियादीगु खः । वय्कलं टाइगर टप्स होटलय् शाहनाप छुं ई भनाभन जूगु धाःसां शाह नं हे गोलीं क्येकूगु बारे धाःसा स्पष्ट यानामदी ।
गोलीकाण्डया छुं दिं लिपा वय्कलं पत्रकारतनाप खँल्हाबंला यानादीगु इलय् पारस शाहं हे थःत गोलीं कयेकूगु व थःत भगवानं बचे याःगु प्रतिक्रिया बियादीगु खः । तर थौं वय्कलं थःगु बयानय् धाःसा उगु खँ न्ह्यथनामदी ।
थौं हे पुलाम्ह युवराज शाहं नं बयान बियादीगु खः । शाह बयान बीत चितवन थ्यंगु इलय् वय्कःया समर्थक नापं जुजुवादीतय्सं अव नारावाजी याःगु खः ।
वंगु मंसिर २५ गते टाइगर टप्स होटलय् शाह व चौधरी दथुइ ल्वापु जूगु खः । उगु इलय् शाहं पेस्तोलं गोलीं कयेकूगु उजुरी लायेवं वय्कः विरुद्ध सार्वजनिक अपराध सम्बन्धी मुद्दा चले याःगु खः ।
