माओवादी टेपया अनावश्यक बयान

प्रधानमन्त्री व माओवादीया अध्यक्ष पुष्पकमल दाहाल 'प्रचण्डं' न्ववाःगु धकाः आः नकतिनि सार्वजनिक जूगु टेप प्रकरणं माओवादी अध्यक्षया विश्वसनीयता व लोकतन्त्र प्रति वय्कःया प्रतिवद्धताय् न्ह्यसः पिकया बिउगु दु । वय्कलं जनसेनाया ल्याः अप्वयेकाः क्यनागु धकाः कार्यकर्तायात धयादीगु खँ टेपपाखें सार्वजनिक जुइवं वय्कःया धापू विवादय् लाःगु खः । टेप प्रकरणं ब्वलंगु विवादं अन्ततः संयुक्त राष्ट्र संघया सुरक्षा परिषद्य् तकं नेपाः बारे न्ह्यसः पिकाःगु व उकिं यानाः नेपाः मामिला स्वयाच्वंगु अनमिनयात समेत मर्काय् लाका बिउगु खँ नं पिदंगु दु ।

तर थौं देशय् गुगु संक्रमणया अवस्था न्ह्यानाच्वंगु खः थ्व इलय् प्रचण्डं गुगुं इलय् गन सुयात छु धाल धइगु खँयात कुलाः मुद्दा दयेकेगु छुं औचित्य दुगु ज्या धाःसा मखु । प्रचण्डं थः कार्यकर्ताया दथुइ छु खँ धाल व उमिगु आन्तरिक मामिला खः । आधिकारिक ला व खः गुगु वय्कलं पिने सकस्यां न्ह्यःने धायेगु यानादी । माओवादी जनसेनाया ल्याः प्यद्वः जुइ बिउ वा प्यसः थ्व उमिसं हे जक सिउगु खँ खः । छाय्धाःसां जनयुद्धजःछि जनसेनाया आधिकारिक ल्याः गबलें नं पिहां मवः । युद्ध दीधुंकाः माओवादीं स्वीन्याद्वः सेना दु धकाः दावी याः थें अनमिनया न्ह्यःने स्वीन्याद्वः मनू हयाः क्यना बिउगु ला ख हे खः । बरु नेपाः सरकारं दयेका तःगु मापदण्ड कथं उपिं सेना जुइत लायक मजुल व मेगु हे खँ जुल । माओवादीं नेपाली सेनाया मापदण्ड कथं जनमुक्ति सेना दयेका तःगु नं मखु । उकिया थःगु हे मापदण्ड दु । उकिं थज्याःगु खँ आः पित हयाः कुलाच्वनेगु धइगु देशय् वयेत्यंगु शान्तियात पनेगु जक जुइ ।

More Stories Like this