बीबीसी सेवा बन्द मयायेत इनाप
बीबीसी विश्व सेवां चैत १३ गतेनिसें सर्टवेभ ट्रान्समिसन बन्द यायेगु घोषणा यायेवं आम नेपाःमिया सहज बुखँ कायेगु अधिकार बन्द जुइगु धासें नेपाःया सञ्चारकःमि लिसे मानवअधिकारकःमिपिंसं च्यूताः प्वंकूगु दु ।
बीबीसी नेपाली समाचारया न्यनामिपिं नेपालय् आपालं दुगु व बन्द जुइवलय् ग्रामीण क्षेत्र लगायतया न्यनामिपिंसं अःपुक्क हे सूचना प्राप्त यायेमफइगु जानकारी ब्यूसें सर्टवेभ ट्रान्समिसन बन्द मयायेत उमिसं नेपाःसं च्वंगु बेलायती दूतावासपाखें बेलायती सरकारयात नापं इनाप पौ लःल्हाःगु दु । इनाप पौपति स्वीस्वम्ह पत्रकार लिसे मानवअधिकारकःमिपिंसं ल्हाःचिं तःगु खः ।
उगु पौपति बीबीसी सेवां सर्टवेभ ट्रान्समिसन बन्द याःसा नेपाःया लखौं न्यनामिपिं सूचनापाखें बञ्चित जुइगु व थुकिं बेलायती सरकार दथुइया दृष्टिकोणय् नापं हिउपाः वयेफूगु न्ह्यथनातःगु खः । नेपाली एफ.एम. रेडियोया पहुँच थ्यनेमफूगु दुर्गम गाँ बस्तीइ मत बिना व्याट्रीया भरय् नं सर्टवेभ ट्रान्समिसन सेवापाखें बीबीसी नेपाली सेवा प्रष्ट न्यनेफइगु जूगुलिं नेपाली एमएफया पहुँच फुक्क नेपाःमिया दथुइतक्क थ्यंके मफुत्तले सेवा मदीकेत बेलायती सरकारयात इनाप याःगु पत्रकार गोकुल पोखरेलं जानकारी बियादिल।
आर्थिक हुनिं क्यनाः चैत १३ गते अर्थात मार्च २७ तारिखनिसें उगु ट्रान्समिसन बन्द यायेगु घोषणा याःगु खः ।
